തിരുരങ്ങാടി ഉള്പ്പെടെ കേരളത്തില് മത്സരിച്ച 25 സീറ്റില് 17 ലും വിജയം നേടുമെന്ന സിപിഐ വിലയിരുത്തല് തള്ളി തിരൂരങ്ങാടി യുഡിഎഫ് സ്ഥാനാര്ത്ഥിയും ലീഗ് നേതാവുമായ കെപിഎ മജീദ്. എന്ത് പ്രതീക്ഷയിലാണ് സിപിഐ ഇത്തരമൊരു വിലയിരുത്തല് നടത്തിയതെന്ന് മനസിലാവുന്നില്ലെന്നും തിരൂരങ്ങാടിയില് യാതൊരു ഭയപ്പാടും ഇല്ലെന്നും കെപിഎ മജീദ് പറഞ്ഞു. ഏഷ്യാനെറ്റ് ന്യൂസിനോടായിരുന്നു കെപിഎ മജീദീന്റെ പ്രതികരണം.
‘തിരൂരങ്ങാടിയില് അങ്ങനെയൊരു ഭയപ്പാട് ഇല്ല. എന്ത് പ്രതീക്ഷയിലാണ് അട്ടിമറി വിജയമെന്ന് പറയുന്നതെന്ന് മനസിലാവുന്നില്ല. കാരണം അങ്ങനെയൊരു അഭിപ്രായം അവിടുത്തെ സഖാക്കള്ക്ക് പോലുമില്ല. ഇത്തരമൊരു വിലയിരുത്തലിലേക്കാണ് സിപിഐ പോകുന്നതെങ്കില് അവര് വലിയ അപകടത്തിലേക്കാണ് പോകുന്നത്. സിപിഐയുടെ സ്ഥിതി ദയനീയമാണ്. പരാജയമാണ് ഉണ്ടാവുക.’ കെപിഎ മജീദ് പറഞ്ഞു.
കേരളത്തില് തിരൂരങ്ങാടി ഉള്പ്പെടെ 17 സീറ്റിലാണ് സിപിഐ വിജയപ്രതീക്ഷ വെക്കുന്നത്. കെപിഎ മജീദിന് എതിരെയുള്ള ലീഗിലെ പ്രശ്നങ്ങളും, സാമുദായിക പിന്തുണയും നിയാസ് പുളിക്കലകത്തിന് അനുകൂലമാകുമെന്നാണ് സിപിഐ കണക്കുകൂട്ടല്. ഇടതു പക്ഷത്തിന് 80 സീറ്റുകള് ഉറപ്പായി ലഭിക്കുമെന്നും സിപിഐ പറയുന്നു.
ബന്ധു നിയമനവുമായി ബന്ധപ്പെട്ട ലോകായുക്ത വിധിയിലും കെടി ജലീലിനെതിരെ കെപിഎ മജീദ് രൂക്ഷമായി വിമര്ശിച്ചു. ധാര്മ്മികതയുണ്ടെങ്കില് കെടി ജലീല് പൊതു പ്രവര്ത്തനം അവസാനിപ്പിക്കണമെന്നും കെപിഎ മജീദ് പറഞ്ഞു. തെറ്റ് സമ്മതിക്കാത്ത ഒരാളെ എങ്ങനെയാണ് ഒരു പാര്ട്ടി സ്വീകരിക്കുക.പൊതു പ്രവര്ത്തനം അവസാനിപ്പിക്കുന്നതാണ് മര്യാദയെന്നും അദ്ദേഹം കൂട്ടി ചേര്ത്തു.
സിപിഐ വിലയിരുത്തല്
80 ലധികം സീറ്റുകള് നേടി എല്ഡിഎഫ് അധികാരത്തിലെത്തുമെന്നാണ് സിപിഐ വിലയിരുത്തല്. തൃശൂര് ഉള്പ്പെടെ ചില സിറ്റിംഗ് സീറ്റുകളില് കടുത്ത മത്സരം ഉണ്ടായി. മത്സരിച്ച 25ല് 17 സീറ്റുകളില് ഉറപ്പായും സിപിഐ വിജയം ആവര്ത്തിക്കുമെന്നും സംസ്ഥാന എക്സിക്യൂട്ടീവ് വിലയിരുത്തി.
തിരൂരങ്ങാടിയില് അട്ടിമറി വിജയം ഉണ്ടാകും. കെപിഎ മജീദിന് എതിരെയുള്ള ലീഗിലെ പ്രശ്നങ്ങളും, സാമുദായിക പിന്തുണയും നിയാസ് പുളിക്കലകത്തിന് അനുകൂലമാകുമെന്നാണ് സിപിഐ കണക്കുകൂട്ടല്. ഇടതു പക്ഷത്തിന് 80 സീറ്റുകള് ഉറപ്പായി ലഭിക്കുമെന്നും സിപിഐ പറയുന്നു. നിശബ്ദ ഇടതു തരംഗം സംസ്ഥാനത്ത് ഉണ്ടായിട്ടുണ്ട്. ഇത് ഇടതുപക്ഷത്തിന് അനുകൂലമെന്നാണ് സിപിഐ വിലയിരുത്തല്.