സംസ്ഥാനത്ത് കൊവിഡ് വ്യാപനം രൂക്ഷമായ സാഹചര്യത്തില് കൂടുതല് ആളുകളെ പങ്കെടുപ്പിച്ച് തൃശൂര് പൂരം നടത്തുന്നതിനെതിരെ ആരോഗ്യവകുപ്പ്. പൂരം നടത്തിപ്പ് സംബന്ധിച്ച് നിലവിലെ സാഹചര്യം കണക്കിലെടുത്ത് സര്ക്കാര് പുനരാലോചന നടത്തണമെന്ന് തൃശൂര് ഡിഎംഒ ആവശ്യപ്പെട്ടു. പൂരത്തിനെത്തുന്ന ആളുകളെ നിയന്ത്രിച്ചില്ലെങ്കില് വലിയ വിപത്താവും സംഭവിക്കുകയെന്ന് തൃശൂര് ഡിഎംഒ അറിയിച്ചു.
ചുരുങ്ങിയത് 20000 പേരെങ്കിലും കൊവിഡ് ബാധിരവാന് ഇത് ഇടയാക്കും. 10 ശതമാനം ഉണ്ടാവാനും സംഭവിക്കാനിടയുണ്ടെന്നും ഡിഎംഒ പറയുന്നു. കഴിഞ്ഞ ഒന്നര വര്ഷമായി ആരോഗ്യവകുപ്പ് നടത്തിയ എല്ലാ കൊവിഡ് പ്രതിരോധ പ്രവര്ത്തനങ്ങളും പാഴായിപ്പോവും. ഇക്കാര്യം ചൂണ്ടിക്കാട്ടി സര്ക്കാരിന് റിപ്പോര്ട്ട് നല്കിയതായി ഡിഎംഒ അറിയിച്ചു.
സംസ്ഥാനത്ത് കൊവിഡ് വ്യാപനം രൂക്ഷമാക്കുന്ന സാഹചര്യത്തില് വീണ്ടും കര്ശനനിയന്ത്രങ്ങള് ഏര്പ്പെടുത്തുകയാണ്. കൊവിഡ് രൂക്ഷമാവുന്ന സാഹചര്യത്തില് പ്രാദേശിക തലത്തില് നിയന്ത്രണങ്ങള് കടുപ്പിക്കാനാണ് തീരുമാനം. കണ്ടെയ്ന്മെന്റ് സോണുകളിലെ നിയന്ത്രണം ഏപ്രില് 30 വരെ നീട്ടി. അതത് ജില്ലകളിലെ സാഹചര്യം കണക്കിലെടുത്ത് ജില്ലാ കളക്ടര് ഇക്കാര്യത്തില് തീരുമാനമെടുക്കും.
സംസ്ഥാനത്ത് ഇന്നലെ 6194 പേര്ക്ക് കോവിഡ്-19 സ്ഥിരീകരിച്ചു. എറണാകുളം 977, കോഴിക്കോട് 791, തിരുവനന്തപുരം 550, മലപ്പുറം 549, തൃശൂര് 530, കണ്ണൂര് 451, ആലപ്പുഴ 392, കോട്ടയം 376, കൊല്ലം 311, പാലക്കാട് 304, കാസര്ഗോഡ് 286, പത്തനംതിട്ട 256, ഇടുക്കി 230, വയനാട് 191 എന്നിങ്ങനേയാണ് ജില്ലകളില് ഇന്ന് രോഗ ബാധ സ്ഥിരീകരിച്ചത്. യുകെ, സൗത്ത് ആഫ്രിക്ക, ബ്രസീല് എന്നീ രാജ്യങ്ങളില് നിന്നും വന്ന ആര്ക്കും തന്നെ കഴിഞ്ഞ 24 മണിക്കൂറിനകം കോവിഡ്-19 സ്ഥിരീകരിച്ചില്ല. അടുത്തിടെ യുകെ (103), സൗത്ത് ആഫ്രിക്ക (7), ബ്രസീല് (1) എന്നീ രാജ്യങ്ങളില് നിന്നും വന്ന 111 പേര്ക്കാണ് ഇതുവരെ കോവിഡ്19 സ്ഥിരീകരിച്ചത്. ഇവരില് 107 പേരുടെ പരിശോധനാഫലം നെഗറ്റീവായി. ആകെ 11 പേരിലാണ് ജനിതക വകഭേദം വന്ന വൈറസിനെ കണ്ടെത്തിയത്.