അബുദാബി: പ്രവാസികള്‍, അവരുടെ ആശ്രിതരായി രാജ്യത്ത് കഴിയുന്നവര്‍ തുടങ്ങി എല്ലാവര്‍ക്കും ആരോഗ്യ ഇന്‍ഷുറന്‍സ് നിര്‍ബന്ധമായ യുഎഇയില്‍ കമ്പനികള്‍ പ്രീമിയം തുക ഉയര്‍ത്തി. 10 മുതല്‍ 35 ശതമാനം വരെ പ്രീമിയം വര്‍ധിപ്പിച്ചത് പ്രവാസി കുടുംബങ്ങളെ ദോഷകരമായി ബാധിക്കും.കഴിഞ്ഞ രണ്ട് മാസത്തിനിടെ പന്ത്രണ്ടോളം ഇന്‍ഷുറന്‍സ് കമ്പനികളാണ് പ്രീമിയം ഉയര്‍ത്തിയതെന്ന് ഖലീജ് ടൈംസ് റിപ്പോര്‍ട്ട് ചെയ്തു. ചികില്‍സാ ചെലവുകള്‍ വര്‍ധിച്ചെന്ന് ചൂണ്ടിക്കാട്ടി മറ്റുള്ള കമ്പനികളും നിരക്ക് വര്‍ധിപ്പിക്കാന്‍ ഒരുങ്ങുകയാണ്. ചുരുക്കം കമ്പനികള്‍ മാത്രമാണ് കുടുംബാംഗങ്ങള്‍ക്ക് ആരോഗ്യ ഇന്‍ഷുറന്‍സ് പരിക്ഷ നല്‍കുന്നത്.രാജ്യത്ത് ജോലിചെയ്യുന്ന വിദേശികളെ തൊഴിലുടമ ഇന്‍ഷുറന്‍സ് പോളിസിയില്‍ ചേര്‍ത്താല്‍ മാത്രമേ റെസിഡന്റ് പെര്‍മിറ്റ് ലഭിക്കുകയുള്ളൂ. ജോലിക്കാരുടെ ഇന്‍ഷുറന്‍സ് തുക തൊഴിലുടമകള്‍ അടയ്ക്കുമെങ്കിലും ജോലിക്കാരുടെ കുടുംബാംഗങ്ങളുടെ പ്രീമിയം നല്‍കുന്നത് അവരുടെ സ്‌പോണ്‍സറായ കുടുംബനാഥനാണ്. പ്രീമിയം നിരക്ക് ഉയര്‍ന്നതോടെ കുടുംബങ്ങളായി രാജ്യത്ത് കഴിയുന്നവര്‍ക്ക് ഈ ഇനത്തിലേക്ക് കൂടുതല്‍ തുക നീക്കിവയ്‌ക്കേണ്ടിവരും.കൊവിഡിന് ശേഷം ആരോഗ്യപ്രശ്‌നങ്ങള്‍ വര്‍ധിച്ചതായും മരുന്നിന്റെയും ചികിത്സയുടെയും ചെലവ് ഉയര്‍ന്നതായും ഇന്‍ഷുറന്‍സ് കമ്പനികള്‍ പറയുന്നു. പണപ്പെരുപ്പം മൂലമുണ്ടായ ചെലവുകളിലെ വര്‍ധന, വൈദ്യചികിത്സ, മരുന്നുകള്‍, മെഡിക്കല്‍ സാങ്കേതികവിദ്യ എന്നിവയുടെ വര്‍ധിച്ചുവരുന്ന ചെലവ്, പ്രായമായവരുടെ ജനസംഖ്യാ നിരക്ക് ഉയര്‍ന്നത്, വിട്ടുമാറാത്ത രോഗങ്ങളുടെ വ്യാപനം എന്നിവ പോലുള്ള നിരവധി ഘടകങ്ങള്‍ പ്രീമിയം വര്‍ധിക്കാനുള്ള കാരണമായി കമ്പനികള്‍ നിരത്തുന്നു.2023 ഓഗസ്റ്റ് മുതല്‍ നിരക്കുകള്‍ വര്‍ധിക്കാന്‍ തുടങ്ങിയെന്ന് ഇന്‍ഷുറന്‍സ് മേഖലയില്‍ പ്രവര്‍ത്തിക്കുന്നവര്‍ ചൂണ്ടിക്കാട്ടി. സെപ്റ്റംബര്‍, ഒക്ടോബര്‍ മാസങ്ങളിലും വര്‍ധന തുടര്‍ന്നു. ചില ഇന്‍ഷുറന്‍സ് കമ്പനികളുടെ അടിസ്ഥാന പ്ലാനുകളുടെ പ്രീമിയത്തില്‍ മാറ്റംവരുത്തിയിട്ടില്ലെങ്കിലും പ്രായപരിധി നിശ്ചയിച്ചിട്ടുള്ള സ്റ്റാന്‍ഡേര്‍ഡ് പ്ലാനുകളുടെ പ്രീമിയം വര്‍ധിച്ചിട്ടുണ്ട്.