കൊയിലാണ്ടി സ്റ്റേഷനിൽ വെച്ച് ട്രെയിനിൽ നിന്ന് പുറത്തേക്ക് ചാടിയ യുവാവിന്റെ ഇരുകാലുകളും വേർപെട്ടു. സന്തരാഗാഛി- ഹൈദരാബാദ് സൂപ്പർ എക്‌സ്പ്രസിലെ യാത്രക്കാരനായിരുന്ന ബെംഗളൂരു ബൊമ്മക്കൽ സ്വദേശിയായ കൃഷ്ണപ്പയുടെ മകൻ ശിവശങ്കറിനാണ് (40) പരിക്കേറ്റത്. ശനിയാഴ്ച രാവിലെ റെയിൽവെ സ്റ്റേഷനിലെ പ്ലാറ്റ്ഫോമിലെ ടിക്കറ്റ് കൗണ്ടറിനു മുൻപിലാണ് സംഭവം നടന്നത്. കൊയിലാണ്ടിയിൽ സ്റ്റോപ്പില്ലാതിരുന്ന ട്രെയിനിൽ നിന്നും പുറത്തേക്ക് ചാടിയ ശിവശങ്കറിന്റെ ഇരുകാലുകളും അറ്റുപോകുകയായിരുന്നു.
അപകടമുണ്ടായ ഉടൻ തന്നെ കൊയിലാണ്ടി ഫയർഫോഴ്‌സ് സംഘം ഇദ്ദേഹത്തെ താലൂക്ക് ആശുപത്രിയിൽ എത്തിച്ചു. പരിക്ക് ഗുരുതരമായതിനാൽ പ്രാഥമിക ചികിത്സയ്ക്കുശേഷം കോഴിക്കോട് മെഡിക്കൽ കോളജ് ആശുപത്രിയിലേക്ക് മാറ്റി.