അഹമ്മദാബാദ്: മതപരമായ പീഡനങ്ങളെത്തുടർന്നും മികച്ച ജീവിതസാഹചര്യങ്ങൾ തേടിയും പാകിസ്ഥാനിൽ നിന്നും ഗുജറാത്തിലെത്തിയ 1,295 പേർക്ക് കഴിഞ്ഞ ഒമ്പത് വർഷത്തിനിടെ ഇന്ത്യൻ പൗരത്വം ലഭിച്ചു. അഹമ്മദാബാദ് ജില്ലാ കളക്ടറാണ് ന്യൂനപക്ഷ സമുദായങ്ങളിൽപ്പെട്ട (ഹിന്ദു, സിഖ്, ജൈന, ബുദ്ധ, പാഴ്സി, ക്രിസ്ത്യൻ) ഇത്രയും പേർക്ക് പൗരത്വം നൽകിയത്. ഔദ്യോഗിക കണക്കുകൾ പ്രകാരം, കഴിഞ്ഞ ഒരു ദശാബ്ദത്തിനിടെ 2,049 പാകിസ്ഥാൻ പൗരന്മാരാണ് അഹമ്മദാബാദിൽ സ്ഥിരതാമസമാക്കി ഇന്ത്യൻ പൗരത്വത്തിനായി അപേക്ഷിച്ചത്. ഇതിൽ 500 മുതൽ 700 വരെ അപേക്ഷകളിൽ ഇപ്പോഴും നടപടിക്രമങ്ങൾ പുരോഗമിക്കുകയാണെന്ന് അധികൃതർ വ്യക്തമാക്കി. അഹമ്മദാബാദിൽ മാത്രം ഓരോ വർഷവും ശരാശരി 150 ഓളം പേരാണ് പൗരത്വത്തിനായി അപേക്ഷിക്കുന്നത്. നഗരത്തിലെ മേഘാനിനഗർ, സർദാർനഗർ, ബാപ്പുനഗർ, നരോദ തുടങ്ങിയ പ്രദേശങ്ങളിലാണ് ഈ കുടുംബങ്ങളിൽ ഭൂരിഭാഗവും താമസിക്കുന്നത്.
2016, 2018 വർഷങ്ങളിൽ പാകിസ്ഥാൻ, അഫ്ഗാനിസ്ഥാൻ, ബംഗ്ലാദേശ് എന്നിവിടങ്ങളിൽ നിന്നുള്ള ന്യൂനപക്ഷ അപേക്ഷകർക്ക് പൗരത്വം നൽകാനുള്ള അധികാരം കേന്ദ്ര സർക്കാർ അഹമ്മദാബാദ്, ഗാന്ധിനഗർ, കച്ച് ജില്ലാ കളക്ടർമാർക്ക് കൈമാറിയിരുന്നു. പിന്നീട് 2019 ലെ പൗരത്വ ഭേദഗതി നിയമം (CAA) വഴി ഈ രാജ്യങ്ങളിൽ നിന്നും 2014 ന് മുൻപ് എത്തിയവർക്ക് പൗരത്വം ലഭിക്കുന്നതിനുള്ള താമസ കാലാവധി 11 വർഷത്തിൽ നിന്നും 5 വർഷമായി കുറയ്ക്കുകയും ചെയ്തു. അപേക്ഷ നൽകി രേഖകൾ പരിശോധിച്ച ശേഷം കളക്ടർക്ക് മുന്നിൽ സത്യപ്രതിജ്ഞ ചെയ്യുന്നതും കേന്ദ്ര-സംസ്ഥാന ഇന്റലിജൻസ് ബ്യൂറോകളുടെ (IB) പശ്ചാത്തല പരിശോധനയും ഉൾപ്പെടെ ആറ് മുതൽ എട്ട് മാസം വരെ എടുത്താണ് പൗരത്വം നൽകുന്നതിനുള്ള നടപടിക്രമങ്ങൾ പൂർത്തിയാക്കുന്നത്.