ജമ്മു: നിയന്ത്രണ രേഖയിലെ ഇന്ത്യൻ സൈനിക പോസ്റ്റുകൾക്കു നേരെ പാക് സൈന്യം നടത്തിയ വെടിവെപ്പിനും ഷെല്ലാക്രമണത്തിനുമിടെ ജമ്മു കശ്മീരിലെ രജൗറി ജില്ലയിൽ ഇന്ത്യൻ സൈനികൻ വീരമൃത്യു വരിച്ചു. ഇന്നലെ 5.30 ഓടെ പാക് ഷെല്ലാക്രമണത്തിൽ ഗുരുതരമായ പരിക്കേറ്റ സുബേദാർ രവീന്ദറാണ് പിന്നീട് മരിച്ചതെന്ന് സൈനിക വക്താവ് മാധ്യമങ്ങളോട് പറഞ്ഞു.
ഇന്നലെ വൈകുന്നേരം 3.30 മുതൽ 5.30 വരെയാണ് നൗഷേര സെക്ടറിലെ ഇന്ത്യൻ സൈനിക പോസ്റ്റുകൾ ലക്ഷ്യമാക്കി പാക് സൈന്യം വെടിവെപ്പും ഷെല്ലാക്രമണവും നടത്തിയത്. പാക് പ്രകോപനത്തിന് ഇന്ത്യൻ സൈന്യം ശക്തമായ തിരിച്ചടി നൽകി.
ധൈര്യവും ആത്മാർഥതയും ഊർജസ്വലതയുമുള്ള സൈനികനായിരുന്നു വീരമൃത്യു വരിച്ച രവീന്ദറെന്ന് സൈനിക വക്താവ് പറഞ്ഞു. അദ്ദേഹത്തിന്റെ ജീവത്യാഗത്തിന് രാജ്യം എന്നും കടപ്പെട്ടിരിക്കുമെന്നും അദ്ദേഹം പറഞ്ഞു.
നിയന്ത്രണ രേഖയിൽ 5100 വെടിനിർത്തൽ കരാർ ലംഘനങ്ങളാണ് പാകിസ്താൻ 2020 ൽ നടത്തിയത്.