ലോക്ക്ഡൗണിന് ശേഷം രണ്ട് ദിവസം നീണ്ടു നില്ക്കുന്ന രാഷ്ട്രീയ കാര്യ സമിതി ചേര്ന്ന് പുനസംഘടനയ്ക്ക് മാര്ഗരേഖ തയ്യാറാക്കും. അടിമുടി മാറ്റത്തിനാണ് കോണ്ഗ്രസ് ഒരുങ്ങുന്നത്. പാര്ട്ടിയുടെ ശാപമായ ജംബോ കമ്മറ്റികള് ഇനിയുണ്ടാവില്ല.
തിരക്ക് കൂട്ടാതെ സമയമെടുത്ത് പുനസംഘടന നടത്താനാണ് നേതൃതലത്തിലെ ധാരണ. ഇതിനായി വിശദമായ മാര്ഗരേഖ തയ്യാറാക്കും. തെരഞ്ഞെടുപ്പ് തോല്വിയെ കുറിച്ച് മണ്ഡലങ്ങളുടെ ചുമതലയുള്ള കെപിസിസി ജനറല് സെക്രട്ടറിമാരോടും ഡിസിസി പ്രസിഡന്റുരോടും വിശദമായ റിപ്പോര്ട്ട് തേടി.
ഇത് കൂടി പരിഗണിച്ചാണ് ലോക്ക്ഡൗണിന് ശേഷം ചേരുന്ന രാഷ്ട്രീയകാര്യ സമിതി പുനസംഘടനയ്ക്ക് മാര്ഗരേഖ തയ്യാറാക്കുക.
രാഷ്ട്രീയ കാര്യ സമതിയില് തെരഞ്ഞെടുപ്പ് സമിതി അധ്യക്ഷനെന്ന നിലയില് തോല്വിയുടെ ഉത്തരവാദിത്വം ഉമ്മന്ചാണ്ടി ഏറ്റെടുത്തു. മുല്ലപ്പള്ളി രാമചന്ദ്രനാവട്ടെ, തോല്വിയുടെ ഉത്തരവാദിത്വം തന്റെ മേല് കെട്ടിവെക്കാന് ശ്രമമെന്ന് പരിഭവിച്ചു. ഉത്തരവാദിത്തം എല്ലാവര്ക്കുമുണ്ടെന്ന് ഓര്മ്മപ്പെടുത്തി. പാര്ട്ടിയിലും പാര്ലമെന്ററി പാര്ട്ടിയിലും ഹൈക്കമാന്ഡ് എടുക്കുന്ന തീരുമാനം അംഗീകരിക്കുമെന്ന് യോഗത്തെ ചെന്നിത്തല അറിയിച്ചു. പരസ്പരം പഴി പറഞ്ഞ് മറ്റുള്ളവര്ക്ക് ചിരിക്കാന് വഴിയൊരുക്കരുതെന്നും ചെന്നിത്തല നേതാക്കളെ ഓര്മിപ്പിച്ചു. എല്ലാം മുതലക്കാന് ആര്എസ്എസ് കാത്തിരിക്കുകയാണെന്ന് കൂടി ചെന്നിത്തല പറഞ്ഞു.
പുനസംഘടന വേണമെന്ന് കെ മുരളീധരനും കെ സുധാകരനും പിജെ കുര്യനുമടക്കമുള്ള നേതാക്കള് നിലപാട് സ്വീകരിച്ചു. രമേശ് ചെന്നിത്തലയും മുല്ലപ്പള്ളിയും മാറണമെന്നാവശ്യപ്പെട്ട പിജെ കുര്യന് എഐസിസി മാനദണ്ഡപ്രകാരമല്ല സ്ഥാനാര്ത്ഥി നിര്ണയമെന്നും കുറ്റപ്പെടുത്തി. നേതാക്കള് ഗ്രൂപ്പ് പണി നിര്ത്തി തെറ്റുതിരുത്തണമെന്ന് കെ സുധാകരനും ആവശ്യപ്പെട്ടു.