യു.എ.ഇയിലേക്ക് യാത്ര ചെയ്യുന്നവർ എല്ലാ രേഖകളും കൈവശം കരുതണമെന്ന് എയർ ഇന്ത്യ എക്‌സ്പ്രസ്





ദുബായ്: യു.എ.ഇയിലെ ഏത് എമിറേറ്റുകളിലേക്ക് യാത്ര ചെയ്യുന്നവരും എല്ലാ രേഖകളും കൈവശം കരുതണമെന്ന് എയർ ഇന്ത്യ എക്‌സ്പ്രസ് അറിയിച്ചു. 

ഓരോ എമിറേറ്റുകളിലും നിർബന്ധമാക്കിയ കോവിഡ് പ്രോട്ടോകോൾ അനുസരിച്ചാണ് യാത്ര ചെയ്യേണ്ടത്. ഇതുമായി ബന്ധപ്പെട്ട എല്ലാ രേഖകളും കൈവശമുണ്ടെന്ന് യാത്ര പുറപ്പെടുന്നതിന് മുമ്പ് തന്നെ ഉറപ്പ് വരുത്തണം. അല്ലാത്തവരെ യാതൊരു കാരണവശാലും യാത്ര ചെയ്യാൻ അനുവദിക്കില്ല. ഏറ്റവും പുതിയ മാർഗനിർദേശങ്ങളിലാണ് എയർ ഇന്ത്യ എക്‌സ്പ്രസ് ഇക്കാര്യം വ്യക്തമാക്കിയത്. 

ദുബായ് റെസിഡൻസ് വിസയുള്ളവർ ജി.ഡി.ആർ.എഫ്.എ അനുമതി പത്രം കൈവശം വെക്കണം. മറ്റ് എമിറേറ്റുകളിലേക്ക് യാത്ര ചെയ്യുന്നവർ ഫെഡറൽ അതോറിറ്റി ഫോർ ഐഡന്റിറ്റി ആന്റ് സിറ്റിസൺഷിപ്പ് (ഐ.സി.എ) അനുമതി ലഭ്യമാക്കണം.

അതേസമയം ദുബായ് എക്‌സ്‌പോ 2020 ന്റെ ഭാഗമായി യാത്ര ചെയ്യുന്നവർക്ക് ഈ രേഖകൾ ആവശ്യമില്ല. കോവിഡ് നെഗറ്റീവ് സർട്ടിഫിക്കറ്റിന്റെ ക്യൂ ആർ കോഡ് ഉള്ള റിപ്പോർട്ട് എല്ലാ യാത്രക്കാരും കൈവശം വെക്കണം. 48 മണിക്കൂറിനുള്ളിൽ എടുത്ത പരിശോധനാ ഫലമാണ് വേണ്ടത്.

 ഇന്ത്യൻ വിമാനത്താവളങ്ങളിൽനിന്ന് യാത്ര പുറപ്പെടുന്നതിന്റെ നാല് മണിക്കൂർ മുമ്പ് റാപ്പിഡ് ടെസ്റ്റും പൂർത്തിയാക്കണമെന്നും വ്യവസ്ഥയുണ്ട്. 

أحدث أقدم