കുവൈറ്റ് സിറ്റി: കുവൈറ്റില്‍ ഫാമിലി ടൂറിസ്റ്റ് വിസകളും സന്ദര്‍ശക വിസകളും താല്‍ക്കാലികമായി നിര്‍ത്തിവച്ചതായി അധികൃതര്‍ അറിയിച്ചു. ഇനി ഒരു അറിയിപ്പുണ്ടാകുന്നത് വരെ കുടുംബ സന്ദര്‍ശനത്തിനും വിനോദ സഞ്ചാരത്തിനുമുള്ള വിസിറ്റ് വിസകള്‍ അനുവദിക്കില്ലെന്ന് ആഭ്യന്തര മന്ത്രാലയം അറിയിച്ചു. ഫസ്റ്റ് ഡെപ്യൂട്ടി പ്രധാനമന്ത്രിയും ആഭ്യന്തര മന്ത്രിയുമായ ശെയ്ഖ് അഹ്മദ് അല്‍ നവാഫിന്റെ നിര്‍ദ്ദേശപ്രകാരമാണ് തിങ്കളാഴ്ച മുതലാണ് വിസ അനുവദിക്കുന്നത് നിര്‍ത്തിവച്ചത്.
രാജ്യത്തേക്ക് പുതുതായി വിസ അനുവദിക്കുന്നതിനായി പുതിയ നടപടിക്രമങ്ങള്‍ കൊണ്ടുവരുന്നതിന്റെ ഭാഗമായാണ് നടപടി. നിലവില്‍ ആഭ്യന്തര മന്ത്രാലയം അണ്ടര്‍ സെക്രട്ടറിയുടെ പ്രത്യേക അനുമതിയോടെ നിയന്ത്രണങ്ങള്‍ക്ക് വിധേയമായാണ് കുടുംബ-സന്ദര്‍ശന വിസകള്‍ കുവൈറ്റ് അനുവദിക്കുന്നത്. 500 ദിനാറിന് മുകളില്‍ ശമ്പളം ഉള്ളവര്‍ക്ക് മാത്രമാണ് നിലവില്‍ സന്ദര്‍ശക വിസകള്‍ അനുവദിക്കുന്നത്. എന്നാല്‍ തിങ്കളാഴ്ച മുതല്‍ ഇതും താല്‍ക്കാലികമായി നിര്‍ത്തിവച്ചിരിക്കുകയാണ്. ഇവ നല്‍കിയിരുന്നത്.
അതേസമയം, കുവൈറ്റില്‍ ഫാമിലി, വിസിറ്റ് വിസകള്‍ അനുവദിക്കുന്നതിനുള്ള ശമ്പള പരിധി ഉയര്‍ത്താന്‍ നീക്കമുള്ളതായി റിപ്പോര്‍ട്ടുകളുണ്ട്. ജീവിത പങ്കാളി, മക്കള്‍ എന്നിവരെ സന്ദര്‍ശന വിസയില്‍ കൊണ്ട് വരാന്‍ കുറഞ്ഞ ശമ്പളം 300 ദിനാറും മാതാപിതാക്കളെ കൊണ്ടുവരാന്‍ കുറഞ്ഞത് 600 ദിനാറും ആക്കി വര്‍ദ്ധിപ്പിക്കാനാണ് നീക്കം. ഇതുമായി ബന്ധപ്പെട്ട ശുപാര്‍ശ കുവൈറ്റ് താമസകാര്യ വകുപ്പ് ആഭ്യന്തര മന്ത്രാലയത്തിന് നല്‍കിയതായി അല്‍ ഖബസ് പത്രം റിപ്പോര്‍ട്ട് ചെയ്തു. സന്ദര്‍ശക വിസ അനുവദിക്കുന്നതിനുള്ള പുതിയ സംവിധാനം അടുത്ത ആഴ്ച നിലവില്‍ വരുമെന്നാണ് റിപ്പോര്‍ട്ട്. ദജീജിലെ താമസകാര്യ വകുപ്പിന്റെ ജോലി ഭാരം കുറക്കാന്‍ എല്ലാ ഗവര്‍ണറേറ്റിലേയും താമസകാര്യ വകുപ്പ് മേധാവികള്‍ക്ക് വിസ അനുവദിക്കുന്നതിനുള്ള അധികാരം നല്‍കുമെന്നും റിപ്പോര്‍ട്ടില്‍ പറയുന്നു.