വയനാട്: കോൺഗ്രസ് നേതാവും എംപിയുമായ രാഹുൽ ഗാന്ധി ഈ മാസം അവസാനം കേരളത്തിലെത്തും. മൂന്ന് ദിവസത്തെ സന്ദർശനത്തിന് എത്തുന്ന രാഹുൽ ജൂൺ 30ന് വയനാട്ടിലെത്തും. ജൂലൈ ഒന്ന്, രണ്ട് ദിവസങ്ങളിൽ അദ്ദേഹം സംസ്ഥാനത്തുണ്ടാകുമെന്ന് വയനാട് ഡിസിസി അറിയിച്ചു. കേരളത്തിലെത്തുന്ന രാഹുൽ ഗാന്ധിക്ക് വൻ സ്വീകരണം ഒരുക്കുമെന്ന് കോൺഗ്രസ് ജില്ലാ നേതൃത്വം അറിയിച്ചു. രാഹുൽ ഗാന്ധിയുടെ വയനാട്ടിലെ ഓഫീസ് എസ്എഫ്ഐ പ്രവർത്തകർ അടിച്ചുതകർത്ത സാഹചര്യത്തിലാണ് മൂന്ന് ദിവസത്തെ സന്ദർശനത്തിനായി അദ്ദേഹം എത്തുന്നത്.
രാഹുൽ ഗാന്ധി എംപിയുടെ ഓഫീസിനു നേരെ നടന്ന ആക്രമണം അംഗീകരിക്കാനാവില്ലെന്ന് എസ്എഫ്ഐ സംസ്ഥാന നേതൃത്വം കഴിഞ്ഞ ദിവസം വ്യക്തമാക്കിയിരുന്നു. എസ്എഫ്ഐ വയനാട് ജില്ലാ കമ്മിറ്റിയുടെ നേതൃത്വത്തിൽ നടന്ന സമരത്തെയും ആക്രമണത്തെയും തള്ളിപ്പറയുന്നുവെന്നും സംസ്ഥാന പ്രസിഡന്റ്‌ കെ അനുശ്രീ, സംസ്ഥാന സെക്രട്ടറി പി എം ആർഷോ എന്നിവർ പ്രസ്താവനയിലൂടെ അറിയിച്ചു.
രാഹുൽ ഗാന്ധി എംപിയുടെ ഓഫീസ് അക്രമിക്കുകയും മൂന്ന് ജീവനക്കാരെ മർദിക്കുകയും ചെയ്ത സംഭവത്തിൽ പോലീസ് അന്വേഷണം ശക്തമാക്കി. കേസിൽ എസ്എഫ്ഐ ജില്ലാ പ്രസിഡൻ്റ് ജോയൽ ജോസഫ്, സെക്രട്ടറി ജിഷ്ണു ഷാജി എന്നിവരടക്കം 19 പേരെ പോലീസ് അറസ്റ്റ് ചെയ്തു.
സംഭവത്തിൽ സർക്കാർ ഉന്നതതല അന്വേഷണം പ്രഖ്യാപിച്ചു. എഡിജിപി മനോജ് എബ്രഹാമിനാണ് അന്വേഷണ ചുമതല. രാഹുലിൻ്റെ ഓഫീസിലെ അതിക്രമത്തിൽ ഒരാഴ്ചയ്ക്കകം റിപ്പോർട്ട് സമർപ്പിക്കാനാണ് മുഖ്യമന്ത്രി പിണറായി വിജയൻ ആഭ്യന്തര അഡീഷണൽ ചീഫ് സെക്രട്ടറിക്ക് നൽകിയിരിക്കുന്ന നിർദേശം. അതേസമയം, അക്രമം നടക്കുമ്പോൾ സംഭവസ്ഥലത്തുണ്ടായിരുന്ന കൽപ്പറ്റ ഡിവൈഎസ്പിയെ അന്വേഷണ വിധേയമായി സസ്പെൻഡ് ചെയ്തു. മുഖ്യമന്ത്രിയുടെ നിർദേശത്തെ തുടർന്നാണ് നടപടി.