റിയാദ്: സൗദി മന്ത്രിസഭയുടെ ആദ്യ വനിതാ ഡെപ്യൂട്ടി സെക്രട്ടറി ജനറലായി ഷിഹാന അൽ അസ്സാസിനെ നിയമിച്ച് സൗദി ഭരണാധികാരി സൽമാൻ രാജാവ്. ഇതാദ്യമായാണ് ഒരു വനിത ഈ പദവിയിലേക്ക് വരുന്നത്. 2018 ആഗസ്ത് മുതൽ സൗദി പബ്ലിക് ഇൻവെസ്റ്റ്മെന്റ് ഫണ്ട് ബോർഡ് ഓഫ് ഡയറക്ടേഴ്സിന്റെ സെക്രട്ടറി ജനറൽ, ജനറൽ കൗൺസൽ എന്നീ നിലകളിൽ പ്രവർത്തിച്ചുവരികയാണ് സൗദിയിലെ പ്രമുഖ അഭിഭാഷക കൂടിയായ ഷിഹാന അൽ അസ്സാസ്.
സൗദിയിൽ വലിയ തോതിൽ നടന്നുകൊണ്ടിരിക്കുന്ന സ്ത്രീ ശാക്തീകരണ ശ്രമങ്ങളുടെ ഭാഗമായാണ് നടപടി. 2017ൽ പബ്ലിക് ഇൻവെസ്റ്റ്മെന്റ് ഫണ്ടിന്റെ ലീഗൽ വിഭാഗത്തിൽ ട്രാൻസാക്ഷൻസ് ഹെഡ്ഡായാണ് അൽ അസ്സാസ് സ്ഥാപനത്തിൽ ജോലിയിൽ പ്രവേശിച്ചത്. ഫണ്ടിന്റെ മാനേജ്മെന്റ് കമ്മിറ്റിയിലും മറ്റ് എക്സിക്യൂട്ടീവ് കമ്മിറ്റികളിലും അവർ അംഗമാണ്. ഫണ്ടിന്റെ പോർട്ട്ഫോളിയോ കമ്പനികൾ പലതിന്റെയും ബോർഡുകളുടെ അധ്യക്ഷ കൂടിയാണ് അൽ അസ്സാസ്.
ബ്രിട്ടനിലെ ദുർഹം സർവകലാശാലയിൽ നിന്ന് നിയമത്തിൽ ഓണേഴ്സ് ബഹുമതിയോടെ ബിരുദം എടുത്ത അൽ അസ്സാസ്, പബ്ലിക് ഇൻവെസ്റ്റ്മെന്റ് ഫണ്ടിൽ വരുന്നതിന് മുമ്പ് ഒൻപത് വർഷത്തോളം വിവിധ അന്താരാഷ്ട്ര നിയമ സ്ഥാപനങ്ങളിൽ പ്രവർത്തിച്ചുവരികയായിരുന്നു. ന്യുയോർക്ക് സുപ്രിം കോടതിയിലും അമേരിക്കൻ നീതിന്യായ മന്ത്രാലയത്തിലും അഭിഭാഷക ലൈസൻസുള്ള അവർ, സൗദിയിലെ ആദ്യ വനിതാ അഭിഭാഷകരിൽ ഒരാൾ കൂടിയാണ്.
ബിരുദ പഠനത്തിന് ശേഷം മൂന്നു വർഷത്തോളം നിയമ സ്ഥാപനമായ ബേക്കർ മക്കെൻസിയിൽ അസോസിയേറ്റായിരുന്നു അവർ. തുടർന്ന് വിൻസൺ ആന്റ് എൽകിൻസിൽ ചേർന്നു. അവിടെ സീനിയർ അസോസിയേറ്റായി അഞ്ച് വർഷത്തോളം ജോലി ചെയ്ത ശേഷം കൗൺസലായി സ്ഥാനക്കയറ്റം ലഭിച്ചു. അവിടം വിട്ടാണ് അവർ പബ്ലിക് ഇൻവെസ്റ്റ്മെന്റ് ഫണ്ടിൽ ചേർന്നത്.
സൗദികൾക്കിടയിൽ വലിയ സ്വാധീനമുള്ള വ്യക്തിത്വത്തിന് ഉടമയായ അൽ അസ്സാസ്, അമേരിക്കൻ യൂനിവേഴ്സിറ്റി ഓഫ് കൊളറാഡോയിൽ ഉൾപ്പെടെ സൗദിയെ പ്രതിനിധീകരിച്ച് വിവിധ അന്താരാഷ്ട്ര സമ്മേളനങ്ങളിലും സെമിനാറുകളിലും പങ്കെടുത്തിട്ടുണ്ട്. യുവതലമുറയെ പ്രോൽസാഹിപ്പിക്കുന്നതിലും അവർക്ക് പ്രചോദനം നൽകുന്നതിലും മുൻപന്തിയിലുള്ള വ്യക്തി കൂടിയാണ് ഷിഹാന അൽ അസ്സാസ്. 2016ൽ ദി ഡീലർ മെയ്ക്കർ ആയി തെരഞ്ഞെടുക്കപ്പെട്ട അവർ, 2020ൽ ഫോബ്സ് മിഡിൽ ഈസ്റ്റിലെ ഏറ്റവും ശക്തരായ 100 വനിതകളിൽ ഒരാളായി സ്ഥാനം പിടിച്ചിരുന്നു.
