കട്ടപ്പന: ഒൻപതാം ക്ലാസ് വിദ്യാർഥിനിയെ ലൈംഗികമായി ദുരുപയോഗം ചെയ്യാൻ ശ്രമിച്ച സ്കൂൾ അധ്യാപകനെതിരെ കേസ്. കട്ടപ്പന പോലീസ് സ്റ്റേഷൻ പരിധിയിലെ സ്കൂളിലാണ് സംഭവം നടന്നത്. കോൺഗ്രസ് അനുകൂല അധ്യാപക സംഘടനാ നേതാവായ ഈട്ടിത്തോപ്പ് പിരിയംമാക്കൽ ഷെല്ലി ജോർജിനെതിരെയാണ് കട്ടപ്പന പോലീസ് കേസെടുത്തിരിക്കുന്നത്.
കേസെടുത്തതിന് പിന്നാലെ പ്രതി ഒളിവിൽ പോയി. ദൂരസ്ഥലത്തു നിന്നും എത്തി ഹോസ്റ്റലിൽ നിന്ന് പഠിക്കുന്ന കുട്ടിയ്ക്ക് നേരെയാണ് പലതവണയായി ലൈംഗികാതിക്രമം നടന്നത്. പെൺകുട്ടിയെ സ്കൂളിൽ വച്ചും പുറത്തു വച്ചും പ്രതി പീഡിപ്പിക്കാൻ ശ്രമിച്ചെന്നാണ് കേസ്. പെൺകുട്ടിയുടെ വീട്ടുകാരുടെ പരാതിയിൽ ചൈൽഡ് ലൈൻ അന്വേഷിച്ച് പൊലീസിന് റിപ്പോർട്ട് നൽകുകയായിരുന്നു.
ലൈംഗിക താൽപര്യത്തോടെ കുട്ടിയുടെ ശരീര ഭാഗങ്ങളിൽ സ്പർശിക്കുകയും ചെയ്തെന്ന് പരാതിയിലുണ്ട്. പ്രതിയെ കണ്ടെത്താൻ അന്വേഷണം ആരംഭിച്ചതായി കട്ടപ്പന പോലീസ് അറിയിച്ചു. ഇയാൾക്കെതിരെ പോക്സോ അടക്കമുള്ള വകുപ്പുകൾ ചുമത്തിയിട്ടുണ്ട്. എരുമേലിയിൽ വച്ചും പ്രതി സമാനമായ ആരോപണം നേരിട്ടിട്ടുണ്ടെന്നാണ് വിവരം.