കോട്ടയം: ഇന്ന് നടക്കുന്ന തിരുനക്കര പകൽപ്പൂരവുമായി ബന്ധപ്പെട്ട്, നഗരത്തിൽ ഗതാഗത നിയന്ത്രണം ഏർപ്പെടുത്തി. നഗരത്തിൽ 2 മണി മുതലാണ് ജില്ലാ പോലീസ് ഗതാഗത ക്രമീകരണങ്ങൾ ഏർപ്പെടുത്തിയിരിക്കുന്നത്.
എംസി റോഡിലൂടെ നാട്ടകം ഭാഗത്തു നിന്നും വരുന്ന വലിയ വാഹനങ്ങൾ സിമന്റ് കവലയിൽ നിന്നും ഇടതു തിരിഞ്ഞ് പാറേച്ചാൽ ബൈപ്പാസ്, തിരുവാതുക്കൽ, കുരിശുപള്ളി, അറുത്തൂട്ടി ജംഗ്ഷൻ വഴി ചാലുകുന്ന് ജംഗ്ഷനിലെത്തി മെഡിക്കൽകോളേജ് ഭാഗത്തേക്ക് പോകണം. കുമരകം ഭാഗത്തേക്കു പോകേണ്ട വാഹനങ്ങൾ തിരുവാതുക്കൽ, അറുത്തൂട്ടി വഴി പോവുക. എംസി റോഡിലൂടെ വരുന്ന കിഴക്കോട്ടു പോകേണ്ട ചെറുവാഹനങ്ങൾ മണിപ്പുഴ നിന്നും വലത്തോട്ടു തിരിഞ്ഞ് ബൈപാസ് റോഡ്, ഈരയിൽക്കടവ്, മനോരമ ജംഗ്ഷൻ വഴി കിഴക്കോട്ടു പോകണം. വലിയ വാഹനങ്ങൾ മണിപ്പുഴ ജംഗ്ഷനിൽ നിന്നും തിരിഞ്ഞ് കടുവാക്കുളം, കൊല്ലാടു വഴി കഞ്ഞിക്കുഴിയിലെത്തി പോവുക.
നാഗമ്പടത്തു നിന്നും വരുന്ന വാഹനങ്ങൾ സിയേഴ്സ് ജംഗ്ഷൻ, റെയിൽവേ സ്റ്റേഷൻ, ലോഗോസ്, ചന്തക്കവല, മാർക്കറ്റ് വഴി എംഎൽ റോഡിലൂടെ കോടിമത ഭാഗത്തേക്ക് പോവുക. കുമരകം ഭാഗത്തു നിന്നും വരുന്ന വാഹനങ്ങൾ ബേക്കർ ജംഗ്ഷനിലെത്തി സിയേഴ്സ് ജംഗ്ഷൻ വഴി വലത്തോട്ടു തിരിഞ്ഞ് ബസ് സ്റ്റാൻഡിലേക്ക് പോവുക. നാഗമ്പടം സ്റ്റാന്റിൽ നിന്നും കാരാപ്പുഴ, തിരുവാതുക്കൽ ഭാഗത്തേക്ക് പോകേണ്ട ബസ്സുകൾ ബേക്കർ ജംഗ്ഷനിലെത്തി അറുത്തൂട്ടി വഴി തിരുവാതുക്കൽ ഭാഗത്തേക്കു പോവുക.
കെകെ റോഡിലൂടെ വരുന്ന ചങ്ങനാശ്ശേരി ഭാഗത്തേക്കു പോകേണ്ട വലിയ വാഹനങ്ങൾ കഞ്ഞിക്കുഴി, ദേവലോകം, കടുവാക്കുളം വഴി പോകണം. ടൗണിലേയ്ക്ക് വരുന്ന പ്രൈവറ്റ് ബസ്സുകൾ കളക്ട്രേറ്റ്, ലോഗോസ് ജംഗ്ഷന്‍, ശാസ്ത്രി റോഡ്, കുര്യൻ ഉതുപ്പു റോഡു വഴി നാഗമ്പടം ബസ് സ്റ്റാൻഡിലേക്കും പോകേണ്ടതാണ്.നാഗമ്പടത്തു നിന്നും കെകെ റോഡിലൂടെ പോകേണ്ട ബസ്സുകള്‍ ബേക്കര്‍ ജംഗ്ഷന്‍, ശാസ്ത്രി റോഡ്, ലോഗോസ് ജംഗ്ഷന്‍ വഴി പോകേണ്ടതാണ്. നാഗമ്പടം ഭാഗത്തു നിന്നും കുര്യന്‍ ഉതുപ്പ് റോഡു വഴി ശാസ്ത്രി റോഡിലേക്ക് വാഹനഗതാഗതം അനുവദിക്കുന്നതല്ല.