തിരുവനന്തപുരം: പുതുപ്പള്ളി ഉപതെരഞ്ഞെടുപ്പിൽ ബിജെപിക്ക് പിന്തുണ പ്രഖ്യാപിച്ചെന്ന വാർത്ത അടിസ്ഥാനരഹിതമെന്ന് എൻഎസ്എസ്. കോട്ടയം പുതുപ്പള്ളി ഉപതെരഞ്ഞെടുപ്പിൽ എൻഎസ്എസ് രാഷ്ട്രീയമായി സമദൂര നിലപാട് തന്നെയാണ് സ്വീകരിക്കുകയായെന്ന് ജനറൽ സെക്രട്ടറി ജി സുകുമാരൻ നായർ പറഞ്ഞു.
പുതുപ്പള്ളിയിൽ ബിജെപിക്ക് പിന്തുണ പ്രഖ്യാപിച്ചെന്ന വാർത്ത തെറ്റാണെന്ന് വാർത്താക്കുറിപ്പിലൂടെ എൻഎസ്എസ് അറിയിച്ചു. എൻഎസ്എസ് സമദൂര നിലപാട് ഉപേക്ഷിച്ചെന്നും പുതുപ്പള്ളിയിൽ ബിജെപിക്ക് പിന്തുണ പ്രഖ്യാപിച്ചെന്നുമുള്ള ഒരു ഓൺലൈൻ ചാനലിൽ വന്ന വാർത്ത തള്ളിയാണ് എൻഎസ്എസ് രംഗത്തുവന്നത്.'എൻഎസ്എസ് ചരിത്രത്തിലാദ്യമായി സമുദൂരസിദ്ധാന്തം ഉപേക്ഷിച്ചെന്നും പുതുപ്പള്ളിയിൽ ബിജെപിക്ക് പിന്തുണ പ്രഖ്യാപിച്ചെന്നും ഒരു ഓൺലൈൻ ചാനലിൽവന്ന വാർത്ത തികച്ചും അടിസ്ഥാനരഹിതമാണ്. പുതുപ്പള്ളി ഉപതെരഞ്ഞെടുപ്പിലും രാഷ്ട്രീയമായി സമദൂര നിലപാട് തന്നെയാണ് എൻ എസ് എസിനുള്ളത്. എൻഎസ്എസ് പ്രവർത്തകർക്ക് അവരുടേതായ രാഷ്ട്രീയത്തിൽ വിശ്വസിക്കാനും വോട്ട് ചെയ്യാനും അവകാശമുണ്ട്. അതുകൊണ്ട് എൻഎസ്എസ് ഏതെങ്കിലും രാഷ്ട്രീയ പാർട്ടിക്ക് പിന്തുണ നൽകി എന്നർഥമില്ല" - എന്ന് പ്രസ്താവനയിലൂടെ എൻഎസ്എസ് അറിയിച്ചു.പുതുപ്പള്ളി ഉപതെരഞ്ഞെടുപ്പിൽ ബിജെപിക്ക് പിന്തുണ പ്രഖ്യാപിച്ചെന്ന വാർത്ത സമൂഹമാധ്യമങ്ങളിലടക്കം വ്യാപകമായതോടെയാണ് പ്രതികരണവുമായി എൻഎസ്എസ് രംഗത്തുവന്നത്. അതേസമയം, വോട്ടെടുപ്പിന് ദിവസങ്ങൾ മാത്രം അവശേഷിക്കെ പുതുപ്പള്ളിയിൽ പ്രചാരണം ശക്തമായി തുടരുകയാണ്. തിരുവോണത്തോടനുബന്ധിച്ച് രണ്ട് ദിവസം മണ്ഡലത്തിൽ പ്രചാരണം നിർത്തിവച്ചിരുന്നു. എൽഡിഎഫും യുഡിഎഫും സംസ്ഥാന നേതാക്കളെ ജില്ലയിൽ സജീവമാക്കി പ്രചാരണം ശക്തമാക്കിയപ്പോൾ ദേശീയ നേതാക്കളെ മണ്ഡലത്തിൽ എത്തിച്ചാണ് ബിജെപി പ്രചാരണം കൊഴുപ്പിക്കുന്നത്.