കൂരോപ്പട : ബ്ലേഡ് മാഫിയാ സംഘം വീട് കയറി ആക്രമിച്ചു; ഗൃഹനാഥൻ ഉൾപ്പെടെ മൂന്ന് പേർക്ക് പരുക്ക്.
ളാക്കാട്ടൂർ കൃഷ്ണവിലാസം കൃഷ്ണൻകുട്ടി നായർ (60), ഭാര്യ ഉഷാകുമാരി (56), മകൻ അമൃത് (24) എന്നിവർക്കാണ് ഇന്നലെ രാത്രിയിലുണ്ടായ ആക്രമണത്തിൽ പരുക്കേറ്റത്. രാത്രി 11 ന് മൃത്തുസ് അലി റഷീദ് എന്നയാളുടെ നേതൃത്വത്തിൽ ആറ് പേർ ഉൾപ്പെട്ട അക്രമി സംഘം വീട്ടിലെത്തി കൃഷ്ണൻകുട്ടി നായരെയും മകൻ അമൃതിനെയും ആദ്യം ആക്രമിച്ചത്. തടസ്സം പിടിക്കാനെത്തിയ ഭാര്യ ഉഷാകുമാരിയെയും മർദ്ദിച്ചു. കമ്പിവടിയും വടിവാളും ഉൾപ്പെടെ മാരകായുധങ്ങളും ഇവരുടെ പക്കൽ ഉണ്ടായിരുന്നു. കമ്പി വടിക്കുള്ള അടിയിൽ കൃഷ്ണൻകുട്ടി നായർക്ക് തലക്ക് സാരമായ മുറിവ് പറ്റി. അമ്യതിന് തലക്കും കൈക്കും പരുക്ക് പറ്റിയിട്ടുണ്ട്. പരുക്കേറ്റവരെ പാമ്പാടി താലൂക്ക് ആശുപത്രിയിൽ പ്രവേശിപ്പിച്ചു. വീടിന്റെ ജനാലകളും മറ്റ് വീട്ടുപകരണങ്ങളും അടിച്ച് തകർക്കുകയും ചെയ്തു. വധഭീഷണി മുഴക്കിയാണ് സംഘം മടങ്ങിയത്. ഇന്നോവയിൽ എത്തിയ അക്രമി സംഘം ഇന്നലെ ഉച്ചക്കും വീട്ടിലെത്തിയിരുന്നു. കൃഷ്ണൻകുട്ടി നായരുടെ മകളുടെ ഭർത്താവ് വിഷ്ണു തലയോലപ്പറമ്പ് സ്വദേശിയായ മൃത്തുസിന്റെ കൈയിൽ നിന്ന് വാങ്ങിയ പണം തിരികെ ആവശ്യപ്പെട്ടാണ് സംഘം എത്തിയത്.
പാമ്പാടി പോലീസ് ഊർജിതമായ അന്വേഷണം നടത്തുന്നുണ്ട്.
അക്രമികളെ ഉടൻ അറസ്റ്റ് ചെയ്യണമെന്ന് പഞ്ചായത്ത് പ്രതിപക്ഷ നേതാവ് അനിൽ കൂരോപ്പട, പഞ്ചായത്ത് വൈസ് പ്രസിഡന്റ് ഗോപി ഉല്ലാസ്, പഞ്ചായത്ത് അംഗങ്ങളായ അമ്പിളി മാത്യൂ, സന്ധ്യാ ജി നായർ, റ്റി.ജി. മോഹനൻ, സി.പി.എം ലോക്കൽ സെക്രട്ടറി ഇ.എസ് വിനോദ്, കോൺഗ്രസ് മണ്ഡലം സെക്രട്ടറി ഗോപൻ വെള്ളമറ്റം തുടങ്ങിയവർ ആവശ്യപ്പെട്ടു.