റെയിൽവേ സ്റ്റേഷനിൽ പാകിസ്ഥാൻ പതാക സ്ഥാപിച്ച യുവാക്കൾ അറസ്റ്റിൽ. നോർത്ത് 24 പർഗാനാസ് ജില്ലയിലെ ഒരു റെയിൽവേ സ്റ്റേഷന് സമീപമുള്ള ശുചിമുറിയുടെ ചുമരിലാണ് പാകിസ്ഥാൻ പതാക സ്ഥാപിച്ചത്. ചന്ദൻ മലകർ (30), പ്രോഗ്യാജിത് മൊണ്ടൽ (45) എന്നിവരാണ് പ്രപിടിയിലായത്. ഇവർ ഒരു രാഷ്ട്രീയ പാർട്ടിയുടെ സജീവ അംഗങ്ങളാണെന്ന് പശ്ചിമ ബംഗാൾ പൊലീസ് വ്യക്തമാക്കി. സനാതനി ഏകതാ മഞ്ച് എന്ന തീവ്രവാദ സംഘടനയുമായി ഇവർക്ക് ബന്ധമുണ്ടെന്നും പൊലീസ് പറഞ്ഞു.
അകൈപൂർ സ്വദേശികളാണ് പിടിയിലായത്. ‘പാകിസ്താൻ സിന്ദാബാദ്, ഹിന്ദുസ്ഥാൻ മുർദാബാദ്’ എന്നാണ് പോസ്റ്ററിൽ എഴുതിയിരുന്നത്. പതാക കണ്ടെത്തിയതിന് പിന്നാലെ തന്നെ പൊലീസ് അന്വേഷണം ആരംഭിച്ചിരുന്നു. സിസിടിവി ദൃശ്യങ്ങൾ കേന്ദ്രീകരിച്ച് നടന്ന പരിശോധനയിലാണ് പ്രതികളെ കണ്ടെത്തിയത്. പ്രദേശത്ത് വർഗീയ കലാപം സൃഷ്ടിക്കാനായി പ്രതികൾ മനഃപൂർവ്വം ചെയ്തതായാണ് പൊലീസിന്റെ കണ്ടെത്തൽ. പ്രതികൾക്കെതിരെ കേസെടുത്ത് അന്വേഷണം ആരംഭിച്ചു. സംഭവത്തിൽ മറ്റാർക്കെങ്കിലും പങ്കുണ്ടോയെന്ന കാര്യവും അന്വേഷിക്കും.
അതേസമയം, പഹൽഗാം ഭീകരാക്രമണത്തിൽ പാകിസ്താനെതിരെ പ്രതിഷേധിച്ചാണ് പാക് പതാക സ്ഥാപിച്ചതെന്നാണ് കോടതിയിൽ ഹാജരാക്കിയ പ്രതികൾ പറഞ്ഞത്.