ഇഡി കേസ് ഒതുക്കാൻ കോഴ ആവശ്യപ്പെട്ട കേസിൽ രണ്ട് പേർ കൊച്ചിയിൽ വിജിലൻസ് പിടിയിൽ. ഇഡി ചോദ്യം ചെയ്ത കൊല്ലം സ്വദേശിയായ കശുവണ്ടി വ്യാപാരിയിൽ നിന്ന് പണം തട്ടാൻ ശ്രമം നടത്തിയ സംഭവത്തിലാണ് 2 പേരെ വിജിലൻസ് പിടികൂടിയിരിക്കുന്നത്. തമ്മനം സ്വദേശി വിൽ‌സൺ, രാജസ്ഥാൻ സ്വദേശി മുരളി എന്നിവരാണ് പിടിയിലായത്. ഇഡി കേസ് ഒതുക്കാൻ രണ്ട് കോടിയാണ് ഇവർ ആവശ്യപ്പെട്ടത്. അഡ്വാൻസ് തുകയായി 2 ലക്ഷം വേണമെന്നും ആവശ്യപ്പെട്ടു. അഡ്വാൻസ് തുക കൈമാറുന്നതിനിടെയാണ് പനമ്പിള്ളി നഗറിൽ വെച്ച് ഇവർ പിടിയിലാകുന്നത്. സംഭവത്തിന് പിന്നിൽ ആരൊക്കെയന്ന് അന്വേഷണം നടന്നുകൊണ്ടിരിക്കുകയാണ്. ഇഡി കേസ് ഉള്ള കാര്യം പ്രതികൾ എങ്ങനെ അറിഞ്ഞുവെന്നതിലു അന്വേഷണം നടത്തുമെന്ന് വിജിലൻസ് അറിയിച്ചു.