ലോകത്തിലെ തന്നെ ഏറ്റവും വിലയേറിയ, സ്വർണ്ണം കൊണ്ട് നിർമ്മിച്ച ടോയ്ലറ്റ് ശിൽപം ലേലത്തിനായി വെച്ചിരിക്കുകയാണ് സോത്ത്ബീസ്. “അമേരിക്ക” എന്ന് പേരിട്ടിരിക്കുന്ന ഈ ശിൽപം പ്രശസ്ത ഇറ്റാലിയൻ കലാകാരനായ മൗറീഷ്യോ കാറ്റെലൻ നിർമ്മിച്ചതാണ്. 2019-ൽ ഇംഗ്ലണ്ടിലെ ബ്ലെൻഹൈം കൊട്ടാരത്തിൽ നിന്ന് മോഷണം പോയ സ്വർണ്ണ ടോയ്‌ലറ്റിന് സമാനമായതും, പൂർണ്ണമായും പ്രവർത്തിക്കുന്നതുമായ ഒരു ടോയ്‌ലറ്റാണിത് എന്നാണ് ലേലം ചെയ്യുന്ന സ്ഥാപനമായ സോത്ത്ബീസ് വ്യക്തമാക്കുന്നത്.
ഈ ശിൽപം നിർമ്മിക്കാൻ 101.2 കിലോഗ്രാം സ്വർണ്ണമാണ് ഉപയോഗിച്ചിരിക്കുന്നത്. ന്യൂയോർക്കിൽ വെച്ച് നവംബർ 18-നാണ് ലേലം നിശ്ചയിച്ചിട്ടുള്ളത്. സ്വർണ്ണത്തിന്റെ ഇപ്പോഴത്തെ വില കണക്കിലെടുത്ത്, ഏകദേശം 10 മില്യൺ ഡോളർ അഥവാ 88,78,53,500 രൂപയാണ് ഇതിന്റെ പ്രാരംഭ വിലയായി നിശ്ചയിച്ചിരിക്കുന്നത്.
കാറ്റെലന്റെ മറ്റു ശിൽപങ്ങളും ഇതിനുമുമ്പ് വൻതുകയ്ക്ക് വിറ്റുപോയിട്ടുണ്ട്. മുട്ടുകുത്തി നിൽക്കുന്ന അഡോൾഫ് ഹിറ്റ്‌ലറുടെ “ഹിം” എന്ന ശിൽപം 2016-ൽ 17.2 മില്യൺ ഡോളറിന് വിറ്റു. കൂടാതെ, ചുവരിൽ ടേപ്പ് ചെയ്ത ഒരു വാഴപ്പഴമായ “എ ബനാന ഡക്റ്റ് ടേപ്പ്ഡ് ടു എ വാൾ” എന്ന സൃഷ്ടി ഈയിടെയായി 6.2 മില്യൺ ഡോളറിനും വിറ്റുപോയിരുന്നു.
“അമേരിക്ക” എന്ന ഈ കലാസൃഷ്ടിയിലൂടെ താൻ അമിതമായ സമ്പത്തിനെ പരിഹസിക്കുകയാണ് എന്ന് കലാകാരൻ മുമ്പ് പറഞ്ഞിരുന്നു. 200 ഡോളറിന്റെ ഉച്ചഭക്ഷണം കഴിക്കുന്ന ഒരാൾക്കും ഒരു ഹോട്ട് ഡോഗ് കഴിക്കുന്ന സാധാരണക്കാരനും ടോയ്‌ലറ്റിന്റെ കാര്യത്തിൽ തുല്യതയുണ്ട് എന്ന് അദ്ദേഹം അഭിപ്രായപ്പെട്ടു.
2016-ൽ “അമേരിക്ക” എന്ന പേരിൽ രണ്ട് സ്വർണ്ണ ടോയ്‌ലറ്റുകളാണ് കാറ്റെലൻ നിർമ്മിച്ചത്. അതിലൊന്ന് 2017 മുതൽ പേര് വെളിപ്പെടുത്താത്ത ഒരു കളക്ടറുടെ കൈവശമാണ്. രണ്ടാമത്തേത് ന്യൂയോർക്കിലെ ഗുഗ്ഗൻഹൈം മ്യൂസിയത്തിലെ ബാത്ത്‌റൂമിൽ പ്രദർശിപ്പിച്ചിരുന്നു. ഒരു ലക്ഷത്തിലധികം സന്ദർശകരാണ് ഇത് കാണാൻ അന്ന് എത്തിയത്.
വിൻസ്റ്റൺ ചർച്ചിലിന്റെ ജന്മസ്ഥലമായ ബ്ലെൻഹൈം കൊട്ടാരത്തിൽ 2019-ൽ ഇത് പ്രദർശനത്തിന് വെച്ചിരുന്നു. എന്നാൽ ദിവസങ്ങൾക്കകം മോഷ്ടാക്കൾ ഇത് കവർന്നു.
ഈ ലേലം വരെ, നവംബർ 8 മുതൽ സോത്ത്ബിയുടെ ന്യൂയോർക്കിലെ പുതിയ ആസ്ഥാനമായ ബ്രൂവർ ബിൽഡിംഗിലെ ബാത്ത്‌റൂമിൽ “അമേരിക്ക” പ്രദർശിപ്പിക്കും. സന്ദർശകർക്ക് ഇത് അടുത്ത് കാണാൻ അവസരമുണ്ട്.
ഗുഗ്ഗൻഹൈമിലും ബ്ലെൻഹൈം കൊട്ടാരത്തിലും ഈ ടോയ്ലറ്റ് സാധാരണ പ്ലംബിംഗ് സംവിധാനവുമായി ബന്ധിപ്പിച്ചിരുന്നു, കൂടാതെ സന്ദർശകർക്ക് 3 മിനിറ്റ് വരെ അപ്പോയിന്റ്‌മെന്റ് ബുക്ക് ചെയ്ത് ഇത് ഉപയോഗിക്കാനും സാധിച്ചിരുന്നു. എന്നാൽ ഇത്തവണത്തെ പ്രദർശനത്തിൽ സന്ദർശകർക്ക് ടോയ്ലറ്റ് ഉപയോഗിക്കാൻ അനുവാദമുണ്ടായിരിക്കില്ല.