414 ദിവസമായി തുടരുന്ന മുനമ്പം ഭൂസമരവേദിയിൽ ഇന്ന് അപ്രതീക്ഷിത നാടകീയ സംഭവങ്ങൾ അരങ്ങേറി. സമരസമിതി സർക്കാർ നൽകിയ ഉറപ്പുകളോട് വിശ്വാസം പ്രകടിപ്പിച്ച് സമരം അവസാനിപ്പിക്കാൻ തയ്യാറെടുക്കുമ്പോഴാണ് വിമത വിഭാഗം മുദ്രാവാക്യം വിളികളോടെ പന്തൽ വിട്ടിറങ്ങി പുതിയ സമരത്തിലേക്ക് കടന്നു.
ബിജെപി അനുകൂലികളായ നാട്ടുകാരാണ് ‘സമരം അവസാനിപ്പിക്കുന്നത് വഞ്ചന’ എന്നാരോപിച്ച് പുതിയ സമരപ്പന്തലിൽ പ്രതിഷേധം ആരംഭിച്ചത്. ഭൂമി പ്രശ്നത്തിന് “ശാശ്വത പരിഹാരം ലഭിക്കും വരെ സമരം തുടരും” എന്ന നിലപാടിലാണ് ഇവർ. പള്ളിക്ക് പുറത്ത് തയ്യാറാക്കിയ വേദിയിലാണ് ഇപ്പോൾ വിമതർ സമരത്തിലിരിക്കുന്നത്.
സർക്കാർ നൽകിയ ഉറപ്പുകളിൽ വിശ്വാസമുണ്ടെന്ന് പറഞ്ഞുകൊണ്ട് സമരസമിതി സമരം അവസാനിപ്പിക്കാൻ ഒരുങ്ങുന്ന സമയത്താണ് ഈ നാടകീയ മാറ്റം. റവന്യൂ മന്ത്രി കെ. രാജൻ, നിയമമന്ത്രി പി. രാജീവ് എന്നിവർ സമാപനയോഗത്തിൽ പങ്കെടുക്കാനിരിക്കെ വിമത വിഭാഗം മുദ്രാവാക്യങ്ങളോടെ പഴയ സമരപ്പന്തൽ വിട്ടിറങ്ങി. വഖഫ് രജിസ്ട്രിയിൽ ഇപ്പോഴും മുനമ്പത്തെ ഭൂമി രേഖപ്പെടുത്തിയിരിക്കുന്നുവെന്നും, അത് നീക്കം ചെയ്യാതെ സമരം അവസാനിപ്പിക്കുന്നത് വഞ്ചനയാണെന്നുമാണ് അവരുടെ ആരോപണം.