ബിജെപിക്ക് സ്വാധീനമുളള എല്ലായിടങ്ങളിലും സ്ഥാനാർത്ഥിയെ നിർത്തിയിട്ടുണ്ടെന്ന് ബിജെപി മുൻ സംസ്ഥാന അധ്യക്ഷൻ കെ സുരേന്ദ്രൻ. മലപ്പുറം, കോഴിക്കോട്, കണ്ണൂർ, എറണാകുളം തുടങ്ങിയ സ്ഥലങ്ങളിൽ ചില വാർഡുകളിൽ സ്ഥാനാർത്ഥികളെ നിർത്താൻ കഴിഞ്ഞിട്ടില്ലെന്നും സംസ്ഥാനത്ത് ഏറ്റവും കൂടുതൽ സീറ്റുകളിൽ മത്സരിക്കുന്ന ഒറ്റക്കക്ഷി ബിജെപിയാണെന്നും കെ സുരേന്ദ്രൻ പറഞ്ഞു.
ശബരിമല സ്വർണക്കൊളളയിൽ എസ് ഐ ടി പ്രധാന കുറ്റവാളികളെ അറസ്റ്റ് ചെയ്യുന്നത് നീട്ടിക്കൊണ്ട് പോവുകയാണെന്നും അദ്ദേഹം ആരോപിച്ചു. കടകംപളളിക്കെതിരായ തെളിവ് നശിപ്പിക്കാൻ ശ്രമം നടക്കുന്നുണ്ടെന്നും ഉണ്ണിക്കൃഷ്ണൻ പോറ്റിയും ദേവസ്വം ബോർഡ് അംഗങ്ങളും മാത്രമല്ല സ്വർണക്കൊളളയ്ക്ക് പിന്നിലെന്നും കെ സുരേന്ദ്രൻ പറഞ്ഞു. നിലവിലെ അന്വേഷണം കണ്ണിൽ പൊടിയിടലാണ്. ഹൈക്കോടതിയെ കബളിപ്പിക്കുന്നു. സാക്ഷികളുടെ മൊഴി രേഖപ്പെടുത്താനുളള നീക്കം സമയം വൈകിപ്പിക്കാനാണ്. അന്വേഷണം വൈകിപ്പിക്കാൻ ഗൂഢാലോചന നടക്കുന്നു’: കെ സുരേന്ദ്രൻ പറഞ്ഞു.
കണ്ണൂരിൽ വനിതാ സംവരണ വാർഡിൽ ബിജെപി പുരുഷ സ്ഥാനാർത്ഥിയെ നിർത്തിയിരുന്നു. പേരാവൂർ ബ്ലോക്ക് പഞ്ചായത്തിലെ വനിതാ സംവരണ ഡിവിഷനിലാണ് ബിജെപി സ്ഥാനാർത്ഥിയായി കെ അനീഷിനെ പ്രഖ്യാപിച്ചത്. അനീഷിന്റെ പത്രിക പക്ഷേ ഭരണാധികാരി തളളി. ജനറൽ ഡിവിഷനായ ആലച്ചേരിയിലും അനീഷ് പത്രിക നൽകിയിരുന്നു. ഈ പത്രികയും തളളി. രണ്ട് പത്രികകളും തളളിയതോടെ പേരാവൂർ ഡിവിഷനിലെ രണ്ട് വാർഡുകളിൽ എൻഡിഎയ്ക്ക് സ്ഥാനാർത്ഥിയില്ലാതായി.
സൂഷ്മപരിശോധനയിലാണ് അനീഷ് രണ്ട് ഡിവിഷനുകളിൽ പത്രിക നൽകിയത് കണ്ടെത്തിയതെന്നും ഇത് അനുവദനീയമല്ലാത്തതിനാലാണ് പത്രിക തളളിയെന്നും ഭരണാധികാരി എ കെ ജയശ്രീ പറഞ്ഞു. നാമനിർദ്ദേശ പത്രികയിൽ പഞ്ചായത്തിന്റെ പേരും ബ്ലോക്ക് ഡിവിഷന്റെ പേരും ഒന്നായതാണ് തെറ്റുവരാൻ കാരണമെന്നാണ് ബിജെപി നേതൃത്വത്തിന്റെ വിശദീകരണം. ആദ്യ ദിവസം നൽകിയ പത്രികയിൽ തെറ്റ് സംഭവിച്ചതിനാലാണ് അടുത്ത ദിവസം ജനറൽ വാർഡിൽ വീണ്ടും പത്രിക സമർപ്പിച്ചതെന്നും ബിജെപി വ്യക്തമാക്കി.