തിരുവനന്തപുരം: കോട്ടയം, ആലപ്പുഴ ജില്ലകളിലെ ചില ഭാഗങ്ങളില് പക്ഷിപ്പനി (എച്ച്5 എന്1) റിപ്പോര്ട്ട് ചെയ്ത സാഹചര്യത്തില് ആരോഗ്യ വകുപ്പ് മന്ത്രി വീണാ ജോര്ജിന്റെ നേതൃത്വത്തില് സ്റ്റേറ്റ് ലെവല് റാപ്പിഡ് റെസ്പോണ്സ് ടീം (ആര്ആര്ടി) യോഗം ചേര്ന്ന് സ്ഥിതിഗതികള് വിലയിരുത്തി. കേരളത്തില് പക്ഷിപ്പനി ഇതുവരെ മനുഷ്യരെ ബാധിച്ചിട്ടില്ലെങ്കിലും മുന് കരുതലുകള് ആവശ്യമാണെന്നും മന്ത്രി വീണാ ജോര്ജ് പറഞ്ഞു. ഫീല്ഡ് തലത്തില് ജാഗ്രത പാലിക്കണം. ആരോഗ്യ വകുപ്പ് നല്കുന്ന മാർഗനിർദ്ദേശങ്ങള് എല്ലാവരും പാലിക്കണം. സംസ്ഥാനത്ത് പക്ഷിപ്പനി സംബന്ധിച്ച് ആരോഗ്യ വകുപ്പ് പ്രത്യേക മാർഗനിർദ്ദേശങ്ങളും (എസ്.ഒ.പി.), സാങ്കേതിക മാർഗനിർദ്ദേശങ്ങളും പുറത്തിറക്കിയിട്ടുണ്ട്. പക്ഷിപ്പനി റിപ്പോര്ട്ട് ചെയ്ത ആലപ്പുഴ, കോട്ടയം ജില്ലകളിലെ പരിശീലനം സിദ്ധിച്ച വണ് ഹെല്ത്ത് കമ്മ്യൂണിറ്റി വോളന്റിയര്മാരുടെ നേതൃത്വത്തില് സാമൂഹിക അവബോധം ശക്തിപ്പെടുത്താനും പ്രതിരോധ നടപടികള് സ്വീകരിക്കാനും മന്ത്രി നിർദ്ദേശം നല്കി. പ്രവര്ത്തനങ്ങള് ഏകോപിപ്പിക്കാന് ജില്ലാതല കണ്ട്രോള് റൂം സ്ഥാപിച്ചിട്ടുണ്ട്. മരുന്നുകളും പിപിഇ കിറ്റ് ഉള്പ്പെടെയുള്ള സുരക്ഷാ സാമഗ്രികളും ഉറപ്പാക്കാന് നിർദ്ദേശം നല്കി