അതിജീവിതയെന്നോ ഇരയെന്നോ ഉള്ള വിളികൾ വേണ്ടെന്നും സമാധാനമായി ജീവിക്കാൻ അനുവദിക്കണമെന്നും അഭ്യർത്ഥിച്ച് നടി പങ്കുവച്ച കുറിപ്പ് ശ്രദ്ധേയമാകുന്നു. തനിക്കെതിരെ നടന്ന അക്രമത്തിൽ നിയമപരമായി പോരാടാൻ തീരുമാനിച്ചത് തെറ്റായിപ്പോയോ എന്ന് തോന്നിപ്പിക്കുന്ന തരത്തിലുള്ള സൈബർ ആക്രമണങ്ങളിലും പ്രചാരണങ്ങളിലും മനംനൊന്താണ് താരം ഇൻസ്റ്റാഗ്രാമിലൂടെ തന്റെ നിലപാട് വ്യക്തമാക്കിയത്.
ഞാൻ ചെയ്ത തെറ്റ്. എനിക്കെതിരെ ഒരു അക്രമം നടന്നപ്പോൾ അതപ്പോൾ തന്നെ പൊലീസിൽ പരാതിപ്പെട്ടത്, നിയമ നടപടി വേണമെന്ന് ആവശ്യപ്പെട്ട് മുന്നോട്ട് പോയത്!! അന്നേ സംഭവിച്ചതെല്ലാം വിധിയാണെന്ന് സമാധാനിച്ച് ആരോടും ഒന്നും പറയാതെ മിണ്ടാതെ ഇരിക്കണമായിരുന്നു. പിന്നീട് എപ്പോഴെങ്കിലും ആ വീഡിയോ പുറത്ത് വരുമ്പോൾ ഇത് എന്തുകൊണ്ട് അന്നേ പൊലീസിൽ പരാതിപ്പെട്ടില്ല എന്ന് കുറ്റപ്പെടുത്തുന്നവരോട് എന്ത് പറയണം എന്നറിയാതെ ആത്മഹത്യ ചെയ്യണമായിരുന്നു.
20 വർഷം ശിക്ഷക്ക് വിധിച്ച് ജയിലിൽ പോയ രണ്ടാം പ്രതി പോകുന്നതിന് മുൻപേ ഒരു വീഡിയോ എടുത്തത് കണ്ടു, അതിൽ ഞാൻ ആണ് നിങ്ങളുടെ നഗ്ന വീഡിയോ എടുത്തത് എന്നുകൂടെ പറയാമായിരുന്നു!! ഇത്തരം വൈകൃതങ്ങൾ പറയുന്നവരോടും പ്രചരിപ്പിക്കുന്നവരോടും, നിങ്ങൾക്കോ, നിങ്ങളുടെ വീട്ടിലുള്ളവർക്കോ ഈ അവസ്ഥ വരാതിരിക്കട്ടെ!! ഇരയല്ല, അതിജീവിതയല്ല, വെറും ഒരു സാധാരണ മനുഷ്യൻ!! എന്നെ ജീവിക്കാൻ അനുവദിക്കൂ