അരൂരിൽ പെട്രോൾ പമ്പിൽ കയറി വാതിലടച്ച് ലഹരി ഉപയോഗിച്ച യുവാവിനെ പിടികൂടി. അരൂർ തെക്ക് പെട്രോൾ പമ്പിലെ ടോയ്ലെറ്റിൽ കയറിയ യുവാവ് ഏറെ നേരം കഴിഞ്ഞിട്ടും പുറത്തിറങ്ങിയില്ല. ഇതോടെ പമ്പിലെ ജീവനക്കാർക്ക് ആശങ്കയായി. വൈകാതെ അരൂർ പൊലീസിൽ വിവരമറിയിച്ചു. പോലീസ് എത്തി നിരവധി പ്രാവശ്യം വിളിച്ചിട്ടും പ്രതികരണമുണ്ടാവുകയോ യുവാവ് വാതിൽ തുറക്കുകയോ ചെയ്തില്ല. തുടർന്ന് പോലീസ് ബലമായി വാതിൽ തുറന്നു. വാതിൽ തുറന്ന ഉടൻ യുവാവ് പുറത്തേക്ക് ഓടി.
അരൂക്കുറ്റി മാത്താനം വളവിന് കിഴക്കുവശം പത്മപ്രഭ വീട്ടിൽ പ്രഭജിത് (ചന്തു – 27) നെ അരൂർ പോലീസ് പിന്തുടർന്ന് പിടികൂടി. ഇയാളുടെ ബാഗിൽ നിന്നും 64 നൈട്രാ സെപാം ഗുളികകൾ കണ്ടെത്തി. അരൂർ, പൂച്ചാക്കൽ സ്റ്റേഷനുകളിൽ വധശ്രമം, മയക്കുമരുന്ന് കച്ചവടം എന്നിവ ഉൾപ്പെടെ നിരവധി കേസുകളിൽ പ്രതിയാണ് പ്രഭജിത് എന്ന് പോലീസ് പറഞ്ഞു. കാപ്പ പ്രകാരമുളള തടവ് കഴിഞ്ഞ് പുറത്തിറങ്ങിയിട്ട് ഒരു മാസമേ ആയിട്ടുളളൂ. ഇയാൾക്ക് എവിടെ നിന്നുമാണ് ലഹരി ഗുളികകൾ ലഭിച്ചതെന്ന് കണ്ടെത്താൻ എസ്.ഐ. അബീഷിന്റെ നേതൃത്വത്തിൽ പ്രത്യേക അന്വേഷണം ആരംഭിച്ചു.