താമരക്കുളം-ഓച്ചിറ റോഡിലെ ചത്തിയറ ഭാഗത്ത് കിലോമീറ്ററുകളോളം ദൂരത്തിൽ വ്യാപകമായി മാലിന്യം തള്ളി. മൃഗാശുപത്രി പരിസരം മുതൽ ഏകദേശം ഒരു കിലോമീറ്റർ ദൂരത്തിലാണ് റോഡരികിൽ പ്ലാസ്റ്റിക് കവറുകളിലും ചാക്കുകളിലുമായി മാലിന്യം നിക്ഷേപിച്ചിരിക്കുന്നത്. തിങ്കളാഴ്ച പുലർച്ചെയാണ് പ്രദേശവാസികൾ ഈ കാഴ്ച കണ്ടത്.
രാത്രിയുടെ മറവിൽ വാഹനത്തിലെത്തി മാലിന്യം റോഡിലേക്ക് വലിച്ചെറിയുന്നതിന്റെ സിസിടിവി ദൃശ്യങ്ങൾ അധികൃതർക്ക് ലഭിച്ചിട്ടുണ്ട്. പച്ചക്കറി-ഭക്ഷണ അവശിഷ്ടങ്ങൾക്കൊപ്പം പ്ലാസ്റ്റിക് കുപ്പികളും പേപ്പറുകളും റോഡിൽ ചിതറിക്കിടക്കുന്ന നിലയിലാണ്. ഏതെങ്കിലും ഉത്സവ പറമ്പുകളിലെ സ്റ്റാളുകളിൽ നിന്നുള്ള അവശിഷ്ടങ്ങളാണ് ഇവയെന്നാണ് പ്രാഥമിക നിഗമനം. മാലിന്യക്കൂമ്പാരത്തിൽ നിന്നും ലഭിച്ച ചില ബില്ലുകളും മറ്റ് രേഖകളും നാട്ടുകാർ ഉദ്യോഗസ്ഥർക്ക് കൈമാറിയിട്ടുണ്ട്.
സംഭവമറിഞ്ഞ് പഞ്ചായത്ത് പ്രതിനിധികൾ സ്ഥലത്തെത്തി സ്ഥിതിഗതികൾ വിലയിരുത്തി. കുറ്റക്കാർക്കെതിരെ വിട്ടുവീഴ്ചയില്ലാത്ത നടപടി സ്വീകരിക്കുമെന്ന് പഞ്ചായത്ത് സെക്രട്ടറി ജി. മധു അറിയിച്ചു. പഞ്ചായത്ത് അധികൃതർ പോലീസിൽ ഔദ്യോഗികമായി പരാതി നൽകി. പഞ്ചായത്ത് പ്രസിഡന്റ് ഷീജാദേവി, അംഗങ്ങളായ ജി. വേണു, എസ്. റീന എന്നിവർ സ്ഥലം സന്ദർശിച്ച് നാട്ടുകാരുമായി സംസാരിച്ചു. സിസിടിവി ദൃശ്യങ്ങളും ലഭിച്ച ബില്ലുകളും കേന്ദ്രീകരിച്ച് പോലീസ് അന്വേഷണം ആരംഭിച്ചു.