കേരളത്തിന് എയിംസ് അനുവദിക്കാത്തതിലെ മാനദണ്ഡങ്ങൾ വ്യക്തമാക്കാൻ കേന്ദ്ര സർക്കാരിന് ഹൈക്കോടതി കൂടുതൽ സമയം അനുവദിച്ചു. മറുപടി നൽകാൻ സാവകാശം വേണമെന്ന കേന്ദ്രത്തിന്റെ ആവശ്യം പരിഗണിച്ച കോടതി, കേസ് ഏപ്രിൽ 10-ലേക്ക് മാറ്റി.
സാമ്പത്തിക വർഷാവസാനമായതിനാൽ ധനകാര്യ മന്ത്രാലയത്തിൽ നിന്നുള്ള വിശദീകരണങ്ങൾ ലഭ്യമായിട്ടില്ലെന്നും, അതിനാൽ സത്യവാങ്മൂലം സമർപ്പിക്കാൻ കൂടുതൽ സമയം വേണമെന്നും കേന്ദ്ര സർക്കാർ കോടതിയെ അറിയിച്ചു. രാജ്യത്തെ മറ്റ് 22 സംസ്ഥാനങ്ങളിൽ എയിംസ് സ്ഥാപിച്ചപ്പോൾ കേരളത്തെ മാത്രം പരിഗണിക്കാതിരുന്നത് എന്തുകൊണ്ടാണെന്ന് വ്യക്തമാക്കാൻ കോടതി നേരത്തെ നിർദ്ദേശിച്ചിരുന്നു.
അതേസമയം, കേന്ദ്രസർക്കാർ മനഃപൂർവ്വം സമയം നീട്ടി ചോദിക്കുകയാണെന്നും തിരഞ്ഞെടുപ്പ് കഴിയുന്നതുവരെ മറുപടി നൽകാതിരിക്കാനാണ് ഈ നീക്കമെന്നും ഹർജിക്കാർ കോടതിയിൽ വാദിച്ചു. കേരളത്തിന് എയിംസ് അനുവദിക്കുന്ന കാര്യത്തിൽ കേന്ദ്രത്തിന്റെ ഭാഗത്തുനിന്ന് വ്യക്തമായ മറുപടി ഉണ്ടാകാത്തത് വലിയ രാഷ്ട്രീയ ചർച്ചകൾക്കും വഴിതെളിച്ചിട്ടുണ്ട്. ഏപ്രിൽ പത്തിന് കേസ് വീണ്ടും പരിഗണിക്കുമ്പോൾ കേന്ദ്രത്തിന്റെ വിശദീകരണം നിർണ്ണായകമാകും