കാഞ്ഞിരംപാറയിലെ ഒരു ഹോട്ടലിന്റെ പാർക്കിങ് ഏരിയയിൽ ഇരിക്കുകയായിരുന്ന യുവാവിനെ മൂന്നംഗ സംഘം ആക്രമിച്ച് ഫോൺ കവരുകയായിരുന്നു. ഇന്നലെ അർധരാത്രി 12:15-ഓടെയാണ് സംഭവം നടന്നത്. 1.25 ലക്ഷം രൂപ വിലവരുന്ന വിലകൂടിയ മൊബൈൽ ഫോണാണ് സംഘം തട്ടിയെടുത്തത്. പുളിയറക്കോണം സ്വദേശി ആദർശ് (24), പിടിപി നഗർ സ്വദേശി അഭിലാഷ് (34), വാഴോട്ടുകോണം സ്വദേശി നൗഫൽ (25) എന്നിവരെ വട്ടിയൂർക്കാവ് പൊലീസ് പിടികൂടി. രാത്രികാലങ്ങളിൽ നഗരത്തിൽ അക്രമങ്ങളും കവർച്ചകളും വർധിക്കുന്ന സാഹചര്യത്തിൽ പൊലീസ് പെട്രോളിംഗ് ശക്തമാക്കിയിട്ടുണ്ട്. പിടികൂടിയ പ്രതികളെക്കുറിച്ച് കൂടുതൽ അന്വേഷണം നടത്തിവരികയാണെന്ന് പൊലീസ് അറിയിച്ചു.