പുതിയ ചിത്രമായ ‘NBK111’ന്റെ ആക്ഷൻ രംഗങ്ങൾ ചിത്രീകരിക്കുന്നതിനിടെ പ്രമുഖ തെലുങ്ക് നടനും രാഷ്ട്രീയപ്രവർത്തകനുമായ നന്ദമുരി ബാലകൃഷ്ണയ്ക്ക് (ബാലയ്യ) പരിക്കേറ്റു. കാക്കിനാഡയിൽ നടൻ മഞ്ചു മനോജുമൊന്നിച്ചുള്ള ആക്ഷൻ രംഗം ചിത്രീകരിക്കുന്നതിനിടയിൽ കാൽ വഴുതി വീഴുകയായിരുന്നു. അപകടത്തെ തുടർന്ന് ചിത്രത്തിന്റെ ഷൂട്ടിങ് താൽക്കാലികമായി നിർത്തിവെച്ചു.
ഡോക്ടർമാരുടെ നിർദേശപ്രകാരം അദ്ദേഹം വേഗത്തിൽ സുഖം പ്രാപിക്കുന്നതിനായി ചെറിയൊരു ശസ്ത്രക്രിയയ്ക്ക് വിധേയനാകുമെന്ന് ചിത്രത്തിന്റെ അണിയറപ്രവർത്തകർ സോഷ്യൽ മീഡിയ പ്ലാറ്റ്ഫോമായ എക്സിലൂടെ (X) അറിയിച്ചു. താരത്തിന്റെ ആരോഗ്യനില തൃപ്തികരമാണെന്നും ആശങ്കപ്പെടേണ്ട സാഹചര്യമില്ലെന്നും നിർമാതാക്കൾ വ്യക്തമാക്കിയിട്ടുണ്ട്.
“ആക്ഷൻ രംഗ ചിത്രീകരണത്തിനിടെ കാൽ വഴുതി വീണാണ് അദ്ദേഹത്തിന് പരിക്കേറ്റത്. മെഡിക്കൽ ടീമിന്റെ നിർദേശപ്രകാരം ചെറിയൊരു ശസ്ത്രക്രിയ ആവശ്യമായി വന്നിട്ടുണ്ട്. താരം എത്രയും വേഗം പൂർണ ആരോഗ്യവാനായി സെറ്റിലേക്ക് തിരികെയെത്തുമെന്നാണ് പ്രതീക്ഷിക്കുന്നത്,” – NBK111 അണിയറപ്രവർത്തകർ
ഗോപിചന്ദ് മാലിനേനി സംവിധാനം ചെയ്യുന്ന ബിഗ് ബജറ്റ് ആക്ഷൻ ഡ്രാമ ചിത്രമാണ് ‘NBK111’. ബാലകൃഷ്ണയുടെ കരിയറിലെ 111-ാമത് ചിത്രമാണിത്. സിനിമയുടെ ആദ്യ ഗ്ലിംപ്സ് ‘എൻട്രി ഓഫ് ആൻ ഇറ’ (Entry of an Era) എന്ന പേരിൽ നേരത്തെ പുറത്തിറങ്ങി ഏറെ ശ്രദ്ധ നേടിയിരുന്നു. താരം എത്രയും വേഗം സുഖം പ്രാപിക്കട്ടെയെന്ന പ്രാർഥനയിലും കാത്തിരിപ്പിലുമാണ് ആരാധകർ