തൃശൂർ: തൃശൂർ മെഡിക്കൽ കോളേജിൽ വൈദ്യുതി തടസ്സം നേരിട്ടതിനെ തുടർന്ന് ശസ്ത്രക്രിയകൾ നിർത്തിവെക്കാൻ നിർദേശം. ഇന്നലെ രാത്രി 10 മണി മുതൽ ആശുപത്രിയിൽ വൈദ്യുതി പ്രതിസന്ധി അനുഭവപ്പെടുകയായിരുന്നു.
സബ്സ്റ്റേഷനിലുണ്ടായ തകരാറാണ് പ്രതിസന്ധിക്ക് കാരണമെന്ന് അധികൃതർ വ്യക്തമാക്കി. വൈദ്യുതി മുടങ്ങിയതിനെ തുടർന്ന് നേരത്തെ നിശ്ചയിച്ച ശസ്ത്രക്രിയകൾ (ഇലക്ടീവ് സർജറികൾ) തൽക്കാലത്തേക്ക് ഒഴിവാക്കിയിട്ടുണ്ട്. നിലവിൽ അടിയന്തര ശസ്ത്രക്രിയകൾ മാത്രമാണ് ആശുപത്രിയിൽ നടത്തുന്നത്.
തൃശൂർ, പാലക്കാട്, മലപ്പുറം ജില്ലകളിലെ നൂറുകണക്കിന് രോഗികൾ ആശ്രയിക്കുന്ന പ്രധാന ആശ്രയ കേന്ദ്രമാണ് ഇവിടം. പ്രതിസന്ധി പരിഹരിക്കാനുള്ള അടിയന്തര ശ്രമങ്ങൾ തുടരുകയാണെന്ന് മെഡിക്കൽ കോളേജ് അധികൃതർ അറിയിച്ചു.