തിരുവനന്തപുരം: സിഎംആർഎൽ ഡയറി വിവാദത്തിൽ ബിജെപി നേതാവ് വി. മുരളീധരന് പിന്തുണയുമായി സംസ്ഥാന അധ്യക്ഷൻ രാജീവ് ചന്ദ്രശേഖർ. എക്സാലോജിക് ഇടപാടിൽ നിന്ന് ശ്രദ്ധ തിരിക്കാനാണ് മുരളീധരനെ ലക്ഷ്യമിടുന്നതെന്നാണ് രാജീവ് ചന്ദ്രശേഖർ സാമൂഹിക മാധ്യമത്തിൽ കുറിച്ചത്. പാർട്ടി മുരളീധരനൊപ്പമാണെന്നും അദ്ദേഹം വ്യക്തമാക്കി. സിഎംആർഎൽ മുൻ എംഡി എസ്.എൻ. ശശിധരൻ കർത്തയുടെ ഡയറിയെന്ന് അവകാശപ്പെട്ട രേഖകൾ ബിജെപി നേതാവ് ഷോൺ ജോർജ് പുറത്തുവിട്ടതോടെയാണ് വിവാദം ശക്തമായത്.
ഡയറിയിൽ വിവിധ രാഷ്ട്രീയ നേതാക്കളുടെ പേരുകളും തുകകളും രേഖപ്പെടുത്തിയിട്ടുണ്ടെന്നാണ് ഷോൺ ജോർജിന്റെ ആരോപണം. രേഖകൾ എസ്എഫ്ഐഒ കോടതിയിൽ സമർപ്പിച്ച രേഖകളുടെ ഭാഗമാണെന്നും അദ്ദേഹം അവകാശപ്പെട്ടിട്ടുണ്ട്. ഡയറിയിലെ ‘മുരളീധരൻ’ എന്ന പരാമർശം താനല്ലെന്ന് വി. മുരളീധരൻ നേരത്തെ വ്യക്തമാക്കിയിരുന്നു. താൻ സിഎംആർഎല്ലിനെതിരെ സമരം നടത്തിയ വ്യക്തിയാണെന്നും പണം വാങ്ങിയിട്ടില്ലെന്നും അദ്ദേഹം പറഞ്ഞു. ഡയറിയിലെ പരാമർശം ഏത് മുരളീധരനെക്കുറിച്ചാണെന്ന് അന്വേഷിക്കണമെന്നും മുരളീധരൻ ആവശ്യപ്പെട്ടിട്ടുണ്ട്.
ഫേസ്ബുക്ക് കുറിപ്പിൻ്റെ പൂർണരൂപം…
എക്സലോജിക് തട്ടിപ്പും പിണറായി വിജയനും മുഹമ്മദ് റിയാസിനും എതിരായ ആരോപണങ്ങളും അഴിമതി നിരോധന നിയമത്തിലെ സെക്ഷൻ 13-ന്റെ വ്യക്തവും നഗ്നവുമായ ലംഘനമാണ്. സർക്കാരിൽ അഴിമതി കാണിക്കുന്നവർക്ക് ശിക്ഷാനടപടികൾ ഉറപ്പാക്കാൻ വേണ്ടിയാണ് അഴിമതി നിരോധന നിയമം ഇന്ത്യൻ നിയമവ്യവസ്ഥയുടെ ഭാഗമായി നിലനിൽക്കുന്നത്. സെക്ഷൻ 13 പ്രകാരം 10 വർഷത്തിലധികം തടവ് ശിക്ഷ ലഭിക്കാവുന്നതിനാൽ, ബിഎൻഎസ്എസ് (BNSS) 173(3) വകുപ്പ് പ്രകാരം പ്രാഥമിക അന്വേഷണം ആവശ്യമില്ലെന്നും ഉടൻ എഫ്ഐആർ രജിസ്റ്റർ ചെയ്യണമെന്നും വ്യക്തമായി പറയുന്നു. എന്നിട്ടും, എൻഫോർസ്മെന്റ് ഡയറക്ടറേറ്റിന്റെ നിയമപരമായ വെളിപ്പെടുത്തലിൽ ഇടപെടാൻ ഒരു അധികാരവുമില്ലാത്ത സംസ്ഥാന ആഭ്യന്തര വകുപ്പ് , ഒരു എസ്ഐടി (SIT) രൂപീകരിക്കാൻ ഇടപെട്ടു.
അഴിമതി രഹിതമായ ഭരണം നമ്മുടേത് പോലുള്ള ഒരു ജനാധിപത്യത്തിൽ ഓരോ പൗരന്റെയും അവകാശമാണ്. അതിനാൽ, എക്സലോജിക് കേസിൽ എഫ്ഐആർ ഫയൽ ചെയ്യാനും പ്രോസിക്യൂഷൻ നടപടികൾ സ്വീകരിക്കാനും വ്യക്തമായ നിയമപരമായ ബാധ്യതയുള്ളപ്പോൾ, മുഖ്യമന്ത്രി വിഡി സതീശൻ അത് ചെയ്യാത്തത് എന്തുകൊണ്ട്?