ഇടതുപക്ഷം നിയമസഭാ തെരഞ്ഞെടുപ്പ് ജയത്തിന്റെ ആശ്വാസത്തില്‍ നില്‍ക്കുകയാണെങ്കിലും കണക്കുകള്‍ പരിശോധിക്കുമ്പോള്‍ ചെറുതായൊന്ന് പിഴച്ചുവെന്നാണ് വിലയിരുത്തല്‍. ജയിക്കുമെന്ന് കരുതിയ 9 സീറ്റുകളിലാണ് എല്‍ഡിഎഫ് തോറ്റത്. പെരുമ്പാവൂരും പാലയും ഉള്‍പ്പെടുന്നതാണ് ഈ മണ്ഡലങ്ങള്‍. മണ്ണാര്‍ക്കാട്, ചാലക്കുടി, തൃപ്പൂണിത്തുറ, പെരുമ്പാവൂര്‍, കടുത്തുരുത്തി, പാലാ, കുണ്ടറ, കരുനാഗപ്പള്ളി, കോവളം എന്നീ മണ്ഡലങ്ങളില്‍ പാര്‍ട്ടി ജയം ഉറപ്പിച്ചിരുന്നെങ്കിലും ഫലം മറിച്ചായിരുന്നു. എം സ്വരാജ് മത്സരിച്ച തൃപ്പൂണിത്തുറയില്‍ 992 വോട്ടിനും ചാലക്കുടിയില്‍ 1057 വോട്ടിനുമാണ് തോറ്റത്.
എന്നാല്‍ തോല്‍ക്കുമെന്ന് വിചാരിച്ച് 7 മണ്ഡലങ്ങളില്‍ വിജയിക്കുകയും ചെയ്തു. കണ്ണൂര്‍, അഴീക്കോട്, കുറ്റ്യാടി, നാദാപുരം, തിരുവമ്പാടി, കോഴിക്കോട് സൗത്ത്, തൃശൂര്‍ എന്നീ മണ്ഡലങ്ങളിലാണ് തോല്‍വി പ്രതീക്ഷിച്ചെങ്കിലും വിജയിച്ചത്. കണ്ണൂരില്‍ 1745 വോട്ട്, അഴീക്കോട് 6141, കുറ്റ്യാടി 333, നാദാപുരം 4035, തിരുവമ്പാടി 5596, കോഴിക്കോട് സൗത്ത് 12459 , തൃശൂര്‍ 946 വോട്ട് വ്യത്യാസത്തിലാണ് വിജയം. ജില്ലാ കമ്മിറ്റികള്‍ സംസ്ഥാന കമ്മിറ്റികള്‍ക്ക് നല്‍കിയ കണക്കുകളുടെ അടിസ്ഥാനത്തിലാണ് മണ്ഡലങ്ങളിലെ വിജയവും തോല്‍വിയും സിപിഐഎം പ്രവചിച്ചത്. എന്നാല്‍ ഇത്തരത്തില്‍ വന്ന മാറ്റം തെരഞ്ഞെടുപ്പിന്റെ വിശദ അവലോകനത്തില്‍ സംസ്ഥാന നേതൃത്വം സ്വയം വിമര്‍ശനമായി ഉയര്‍ത്തി.