തിരുവനന്തപുരം: ദത്തു വിവാദത്തില് ശിശുക്ഷേമ സമിതി ജനറല് സെക്രട്ടറി ഷിജു ഖാനെതിരെ രൂക്ഷ വിമര്ശനവുമായി ഇടതു സഹയാത്രികനും എഴുത്തുകാരനുമായ ബെന്യാമിന്. ശിശുക്ഷേമ സമിതിക്കു വീഴ്ച വന്നതായ വകുപ്പു തല അന്വേഷണ റിപ്പോര്ട്ടു പുറത്തുവന്നതിനു പിന്നാലെയാണ് ബെന്യാമിന്റെ പ്രതികരണം. ഇനിയും നാണംകെട്ട ന്യായങ്ങള് പറയാന് നില്ക്കാതെ രാജിവച്ച് ഇറങ്ങിപ്പോണം, മി. ഷിജു ഖാന് എന്നാണ് ബെന്യാമിന് ഫെയ്സ്ബുക്കില് കുറിച്ചത്.
കുഞ്ഞിനെ ദത്ത് നൽകിയതിൽ ഗുരുതര വീഴ്ചയെന്ന് റിപ്പോർട്ട്
അനുപമയുടെ കുഞ്ഞിനെ ദത്തു നല്കിയ സംഭവത്തില് സിഡബ്ല്യുസിയുടേയും ശിശുക്ഷേമസമിതിയുടേയും ഭാഗത്തു നിന്ന് ഉണ്ടായത് ഗുരുതര വീഴ്ചകളെന്നാണ് വകുപ്പു തല അന്വേഷണ റിപ്പോര്ട്ടില് പറയുന്നത്. അനുപമ പരാതിയുമായി എത്തിയശേഷവും ദത്ത് സ്ഥിരപ്പെടുത്തലിലേക്ക് കടന്നു എന്നും റിപ്പോര്ട്ടില് ചൂണ്ടിക്കാട്ടുന്നു. വനിതാ ശിശു വികസന ഡയറക്ടര് ടി വി അനുപമ റിപ്പോര്ട്ട് മന്ത്രി വീണാ ജോര്ജ്ജിന് കൈമാറി.
ശിശുക്ഷേമസമിതി രജിസ്റ്ററിലെ ഒരു ഭാഗം മായ്ച്ചുകളഞ്ഞതായി അന്വേഷണത്തില് കണ്ടെത്തി. ദത്ത് തടയാന് സിഡബ്ല്യുസി ഇടപെട്ടില്ലെന്നും പൊലീസിനെ അറിയിച്ചില്ലെന്നും റിപ്പോര്ട്ടില് പറയുന്നു. അനുപമയുടെ പരാതി ലഭിച്ചിട്ടും സമിതി ദത്ത് നടപടികളുമായി മുന്നോട്ട് പോയി എന്നും റിപ്പോര്ട്ടില് പറയുന്നു. ഏപ്രില് മാസത്തില് തന്നെ അജിത്തും അനുപമയും പരാതി നല്കിയിരുന്നു. ഓഗസ്റ്റ് ഏഴിനാണ് ആന്ധ്ര ദമ്പതികള്ക്ക് കുട്ടിയെ ദത്ത് നല്കിയത്.
അനുപമ പരാതിയുമായി എത്തിയ ശേഷവും ദത്ത് സ്ഥിരപ്പെടുത്തല് നടപടികളിലേക്ക് കടന്നു. ഏപ്രില് 22ന് സിറ്റിങ് നടത്തിയിട്ടും ദത്ത് തടയാന് സിഡബ്ല്യുസി ഇടപെട്ടില്ല. അനുപമയുമായുള്ള സിറ്റിങ്ങിന് ശേഷവും സിഡബ്ല്യുസി പൊലീസിനെ അറിയിച്ചില്ല. തുടങ്ങിയ കാര്യങ്ങളും റിപ്പോര്ട്ടില് അക്കമിട്ട് നിരത്തിയിട്ടുണ്ട്. എല്ലാ വിഭാ?ഗങ്ങളില് നിന്നും തെളിവെടുത്തശേഷമാണ് ശിശുവികസന ഡയറക്ടര് അന്തിമ റിപ്പോര്ട്ട് തയ്യാറാക്കിയത്.