കുമളി: മുല്ലപ്പെരിയാര് അണക്കെട്ടില് ജലനിരപ്പ് 136 അടിയിലേക്ക്. തമിഴ്നാട് കേരളത്തിന് ആദ്യ മുന്നറിയിപ്പ് നൽകി. പെരിയാറില് ജലനിരപ്പ് കുറഞ്ഞ് നില്ക്കുന്നതിനാല് ആശങ്കപ്പെടേണ്ട സാഹചര്യം നിലവിലില്ലെന്നാണ് ജില്ലാ ഭരണകൂടം വ്യക്തമാക്കുന്നത്. അണക്കെട്ടിന്റെ വൃഷ്ടി പ്രദേശത്ത് ശനിയാഴ്ച മഴ വളരെ കുറവായിരുന്നുവെങ്കിലും നീരൊഴുക്കില് കാര്യമായ മാറ്റം ഉണ്ടാകാതിരുന്നതോടെ ജലനിരപ്പ് ഉയരുകയായിരുന്നു. വെള്ളിയാഴ്ച അണക്കെട്ടില് ജലനിരപ്പ് 134.1 അടിയായിരുന്നു. ശനിയാഴ്ച വൈകീട്ട് അഞ്ചോടെ ജലനിരപ്പ് 135.40 അടിയിലെത്തിയതോടെ തമിഴ്നാട് ആദ്യ ജാഗ്രത നിര്ദേശം കൊടുക്കുകയായിരുന്നു.
നിലവില് അണക്കെട്ടിലേക്ക് സെക്കന്ഡില് 3700 ഘനയടി വെള്ളമാണ് ഒഴുകിയെത്തുന്നത്. തമിഴ്നാട് 1867 ഘനയടി വെള്ളമാണ് സെക്കന്ഡില് അണക്കെട്ടില് നിന്നും കൊണ്ടുപോകുന്നത്. തമിഴ്നാട്ടില് മഴയില്ലാതിരിക്കുകയും അണക്കെട്ടുകളില് ജലനിരപ്പ് കുറഞ്ഞ് നില്ക്കുന്ന സാഹചര്യവുമുള്ളതിനാല് 2800 ഘനയടി വെള്ളംവരെ തമിഴ്നാട് ഒഴുക്കിക്കൊണ്ട് അണക്കെട്ടിലെ ജലനിരപ്പ് കുറയ്ക്കാന് സാധ്യതയുണ്ട്.
മുല്ലപ്പെരിയാര് അണക്കെട്ടിന്റെ ഷട്ടറുകള് തുറക്കാനുള്ള സാധ്യതകള് പരിഗണിച്ച് മഞ്ചുമല ഓഫീസ് ആസ്ഥനാമാക്കി 24 മണിക്കൂര് പ്രവര്ത്തിക്കുന്ന പ്രത്യേക കണ്ട്രോള് റൂ സജ്ജമാക്കിയിട്ടുണ്ട്. സുപ്രീംകോടതിയുടെ നിര്ദേശപ്രകാരം 136.3 അടി വെള്ളമെ അണക്കെട്ടില് ജുലൈ 19 വരെ സംഭിക്കാനാകു. പെരിയാര് തീരദേശവാസികള് നിലവില് ആശങ്കപ്പെടേണ്ട സാഹചര്യമില്ലെന്ന് ജില്ലാഭരണകൂടം വ്യക്തമാക്കിയിട്ടുണ്ട്.