മക്ക: വിദേശ ഹജ്ജ് തീര്ഥാടകര്ക്കായി സൗദി ഹജ്ജ് ഉംറ മന്ത്രാലയം ഇത്തവണ നടപ്പിലാക്കിയിരിക്കുന്നത് സമഗ്ര ഇന്ഷൂറന്സ് പദ്ധതി. ഹജ്ജ് വേളയില് ഉണ്ടാവുന്ന എല്ലാ അപടകടങ്ങള്, രോഗങ്ങള്, യാത്രാ സംബന്ധമായ പ്രശ്നങ്ങള് തുടങ്ങിയവയ്ക്കെല്ലാം മതിയായ നഷ്ടപരിഹാരം ഉറപ്പുവരുത്തുന്നതാണ് ഇത്തവണനടപ്പിലാക്കിയ ഇന്ഷുറന്സ് പദ്ധതിയെന്ന് അധികൃതര് അറിയിച്ചു.
അപടകങ്ങളില് മരണം സംഭവിക്കുകയോ പൂര്ണ വൈകല്യം സംഭവിക്കുകയോ ചെയ്താല് മതിയായ നഷ്ടപരിഹാരം പദ്ധതിയിലൂടെ ലഭ്യമാവും. അപകട മരണം സംഭവിക്കുന്ന കേസുകളില് ബന്ധുക്കള് ആവശ്യപ്പെടുന്ന പക്ഷം മൃതദേഹം വീട്ടിലെത്തിക്കുന്നതിനുള്ള ചെലവും ഇന്ഷുറന്സ് കമ്പനി വഹിക്കും. രാജ്യത്ത് നിന്ന് പുറപ്പെടുന്ന വിമാനം വൈകുകയോ റദ്ദാവുകയോ ചെയ്യുന്നത് മൂലമുള്ള നഷ്ടങ്ങളും ഇന്ഷുറന്സിന്റെ പരിധിയില് വരും. അതോടൊപ്പം കൊവിഡ് രോഗം ബാധിച്ചവര്ക്കുള്ള ക്വാറന്റൈന്, ചികില്സാ ചെലവുകള്ക്കും പദ്ധയില് കവറേജ് ലഭിക്കും.
അപകടത്തില് പെടുന്നവര്ക്ക് പെട്ടെന്നുള്ള ചികില്സ ലഭ്യമാക്കുകയും അവരുടെ തീര്ഥാടനം മുടങ്ങാതെ നോക്കുകയും ചെയ്യാന് ഇതുവഴി സാധിക്കും. തവുനിയ ഇന്ഷുറന്സ് കമ്പനിയുടെ നേതൃത്വത്തിലുള്ള പ്രാദേശിക ഇന്ഷൂറന്സ് സ്ഥാപനങ്ങള് വഴിയാണ് ഇത് ലഭ്യമാക്കുക. തീര്ഥാടകര് പാസ്പോര്ട്ട് നമ്പര് മാത്രം നല്കിയാല് ഇന്ഷുറന്സ് സേവനങ്ങള് ലഭ്യമാകും. സേവനം ആവശ്യമുള്ളവര് 800440008 എന്ന നമ്പറിലോ www.enaya-ksa.com എന്ന വെബ്സൈറ്റ് വഴി രജിസ്റ്റര് ചെയ്യുകയോ ചെയ്താല് മതിയാകുമെന്നും മന്ത്രാലയം അറിയിച്ചു.