.jpeg)
എറണാകുളം: തിരുവോണം ആഘോഷിക്കാനുള്ള അവസാനവട്ട ഒരുക്കങ്ങളുടെ തിരക്കിലാണ് മലയാളികൾ ഉത്രാടദിനമായ ഇന്ന്, രാവിലെ മുതലെ കടകളിലും ചന്തകളിലും വൻ ജനത്തിരക്കാണ് അനുഭവപ്പെടുന്നത്. കൊച്ചി നഗരത്തിലെ ഓണക്കാഴ്ചയും മറ്റിടങ്ങളിൽനിന്നും വ്യത്യസ്തമല്ല. എറണാകുളം മാർക്കറ്റിൽ സാധനങ്ങൾ വാങ്ങാനെത്തുന്നവരുടെ കുത്തൊഴുക്കാണ് രാവിലെമുതൽ കാണാൻ സാധിക്കുന്നത്.
പച്ചക്കറികളും പഴങ്ങളും പൂക്കളും ഓണക്കോടികളുമെല്ലാം വാങ്ങാനുള്ള അവസാനവട്ട ഓട്ടത്തിലാണ് പൊതുജനങ്ങൾ. നഗരത്തിലെ പച്ചക്കറി ചന്തകളും ഓണത്തിന് സജീവമാണ്. കഴിഞ്ഞമാസം പച്ചക്കറിക്കുണ്ടായ വിലക്കയറ്റം, ഓണത്തോടെ താഴേക്ക് ഇറങ്ങിയത് ജനങ്ങൾക്ക് നേരിയ ആശ്വാസമായി. ഉത്രാടത്തിരക്ക് കണക്കിലെടുത്ത് നഗരത്തിന്റെ വിവിധ ഇടങ്ങളിൽ ഗതാഗതനിയന്ത്രണങ്ങൾ പോലീസ് ഏർപ്പെടുത്തിയിട്ടുണ്ട്.
ഓണത്തോടെ കൊച്ചിയിലെ വസ്ത്ര വ്യാപാരസ്ഥാപനങ്ങളും സജീവമാണ്. കൊച്ചി നഗരത്തിലെ എല്ലാ കടകളിലും ചെറിയ കുട്ടികൾ മുതല്‍ പ്രായമായവരുടെവരെ നീണ്ട നിരകാണാം. തിരുവോണ ദിനത്തിൽ പൂക്കളം ഒരുക്കാനായി ജനങ്ങളെത്തിയതോടെ നഗരത്തിലെ പൂക്കച്ചവടക്കാരും തിരക്കിലാണ്.