വണ്ടിപ്പെരിയാർ: നിയന്ത്രണം വിട്ട കാർ മറിഞ്ഞ് കാർ യാത്രികരായ മൂന്നു പേർക്ക് പരിക്കേറ്റു. വണ്ടൻമേട് സ്വദേശികളായ ഡ്രൈവർ വിപിൻ (32), രാമൻ നായർ (69 ), ആദിത്യൻ (17) എന്നിവർക്കാണ് പരിക്കേറ്റത്. 62-ാം മൈൽ പോളിടെക്നിക് കോളേജിനു സമീപം ആണ് അപകടം നടന്നത്. കോട്ടയം മെഡിക്കൽ കോളേജിൽ ചികിത്സയ്ക്കു ശേഷം വണ്ടൻമേട്ടിലേക്ക് രോഗിയുമായി പോയ കാറാണ് അപകടത്തിൽപ്പെട്ടത്. ദേശീയ പാതയിൽ പട്രോളിംഗിനുണ്ടായിരുന്ന വണ്ടിപ്പെരിയാർ പൊലീസിന്റെയും നാട്ടുകാരുടെയും നേതൃത്വത്തിലാണ് രക്ഷാപ്രവർത്തനം നടത്തിയത്. പരിക്കേറ്റവരെ വണ്ടിപ്പെരിയാറിലെ സ്വകാര്യ ആശുപത്രിയിൽ പ്രവേശിപ്പിച്ചു.