ഞായറാഴ്ച വിജയനഗരം കൻ്റോൺമെൻ്റിന് കീഴിലുള്ള ദ്വാരപുഡി ഗ്രാമത്തിലാണ് ദാരുണമായ ദുരന്തം നടന്നത്. ഉദയ് (8), ചാരുമതി (8), കരിഷ്മ (6), മാനസ്വി (6) എന്നിവരാണ് മരിച്ചത്. മരിച്ചവരിൽ ചാരുമതിയും കരിഷ്മയും സഹോദരിമാരാണ്. മറ്റുള്ളവർ അവരുടെ കൂട്ടുകാരായിരുന്നു.
പോലീസ് നൽകുന്ന പ്രാഥമിക വിവരങ്ങൾ അനുസരിച്ച്, കുട്ടികൾ കളിക്കുന്നതിനിടെ സമീപത്ത് പാർക്ക് ചെയ്തിരുന്ന കാറിൽ കയറുകയായിരുന്നു. കാറിന്റെ വാതിലുകൾ അബദ്ധത്തിൽ അകത്ത് നിന്ന് പൂട്ടിപ്പോയതോടെ ഇവർ വാഹനത്തിനുള്ളിൽ കുടുങ്ങി. സമയം കഴിഞ്ഞിട്ടും കുട്ടികളെ കാണാതായതിനെ തുടർന്ന് മാതാപിതാക്കളും നാട്ടുകാരും ചേർന്ന് തിരച്ചിൽ ആരംഭിച്ചു. ഈ തിരച്ചിലിനൊടുവിലാണ് പ്രാദേശിക മഹിളാ മണ്ഡലി ഓഫീസിന് സമീപം പാർക്ക് ചെയ്തിരുന്ന കാറിനുള്ളിൽ കുട്ടികളെ മരിച്ച നിലയിൽ കണ്ടെത്തിയത്.