ഇവിടെ താമസിക്കുന്ന ഇന്ത്യൻ പൗരന്മാരുടെയോ ന്യൂസിലാൻഡിലെ സ്ഥിരതാമസക്കാരുടെയോ മാതാപിതാക്കൾക്ക് ഇനി സ്ഥിര താമസത്തിന് അപേക്ഷിക്കാതെ തന്നെ 10 വർഷം വരെ രാജ്യത്ത് തുടരാം. പാരൻ്റ് ബൂസ്റ്റ് വിസക്കായി 2025 സെപ്റ്റംബർ 29 മുതൽ അപേക്ഷകൾ സ്വീകരിക്കും.
അടുത്തിടെയാണ് ന്യൂസിലാൻഡ് ഗവൺമെൻ്റ് ദീർഘകാല സന്ദർശന വിസയായ പാരൻ്റ് ബൂസ്റ്റ് വിസ പ്രഖ്യാപിച്ചത്. ഈ വിസ ഉപയോഗിച്ച്, മാതാപിതാക്കൾക്ക് തുടക്കത്തിൽ 5 വർഷം വരെ ന്യൂസിലാൻഡിൽ താമസിക്കാൻ കഴിയും. അതിനുശേഷം 5 വർഷത്തേയ്ക്ക് വിസ നൽകുന്നതിന് വീണ്ടും അപേക്ഷ നൽകാം. ഇതോടെ ആകെ 10 വർഷം വരെ മാതാപിതാക്കൾക്ക് രാജ്യത്ത് താമസിക്കാൻ സാധിക്കും.
ഇതുവരെ സ്റ്റാൻഡേർഡ് പാരൻ്റ്, ഗ്രാൻഡ്പാരൻ്റ് സന്ദർശന വിസയിൽ മൂന്ന് വർഷത്തിൽ 18 മാസം മാത്രമേ താമസിക്കാൻ അനുവാദമുള്ളൂ. പുതിയ പാരൻ്റ് ബൂസ്റ്റ് വിസ ന്യൂസിലാൻഡിൽ താമസിക്കാൻ 10 വർഷം വരെ അനുവാദം നൽകുന്നു എന്നതാണ് സവിശേഷത. ഇത് പ്രായമായ മാതാപിതാക്കൾക്ക് ദീർഘകാലം മക്കളോടൊപ്പം കഴിയാനുള്ള അവസരമാണ്. എന്നാൽ, ഈ വിസ സ്ഥിരതാമസത്തിനുള്ളതല്ലെന്ന കാര്യവും പ്രത്യേകം എടുത്തുപറയേണ്ടതാണ്.