ഫോർട്ട് മോർഗൻ തെക്ക്കി ഴക്കൻ കൊളൊറാഡോയിൽ ആകാശ മധ്യേ ചെറുവിമാനങ്ങൾ തമ്മിൽ കൂട്ടിയിടിച്ച് ഒരു യാത്രക്കാരൻ കൊല്ലപ്പെട്ടു. 3 പേർക്ക് പരുക്ക്. ഫോർട്ട് മോർഗൻ മുനിസിപ്പൽ വിമാനത്താവളത്തിലേക്ക് ലാൻഡ് ചെയ്യാൻ ശ്രമിക്കവേയാണ് വിമാനങ്ങളുടെ കൂട്ടിയിടി.
ഞായറാഴ്ച രാവിലെയാണ് സെസ്സ്ന 172, എക്സ്ട്രാ ഫ്ലഗ്ഗ്ബു എന്നീ ചെറുവിമാനങ്ങൾ കൂട്ടിയിടിച്ചതെന്ന് ഫെഡറൽ ഏവിയേഷൻ അഡ്മ‌ിനിസ്ട്രേഷൻ അധികൃതർ വ്യക്തമാക്കി. കൂട്ടിയിടിയുടെ ആഘാതത്തിൽ രണ്ടു വിമാനങ്ങളും തകർന്ന് വീണ് തീപിടിക്കുകയായിരുന്നു. രണ്ട് വിമാനങ്ങളിലുമായി നാല് പേരാണ് ഉണ്ടായിരുന്നത്.
സെസ്സ്ന വിമാനത്തിലുണ്ടായിരുന്ന രണ്ട് പേരും നിസ്സാര പരുക്കുകളോടെ രക്ഷപ്പെട്ടു. വിമാനത്തിലുണ്ടായിരുന്ന ഒരാൾക്ക് പരുക്കേൽക്കുകയും രണ്ടാമത്തേയാൾ അപകടസ്ഥലത്ത് വച്ച് തന്നെ മരിക്കുകയും ചെയ്തു.
അപകടം സംബന്ധിച്ച് നാഷനൽ ട്രാൻസ്പോർട്ടേഷൻ സേഫ്റ്റി ബോർഡ്, എഫ്എഎ അധികൃതർ അന്വേഷണം ആരംഭിച്ചു. ഡെൻവറിൽ നിന്ന് വടക്കുകിഴക്കായി ഏകദേശം 130 കിലോമീറ്റർ അകലെയായി സ്‌ഥിതി ചെയ്യുന്ന ചെറു നഗരമാണ് ഫോർട്ട് മോർഗൻ. 12,000 പേർ മാത്രമാണ് ഇവിടുത്തെ താമസക്കാർ.