ഓട്ടോറിക്ഷ പിന്നോട്ട് ഉരുണ്ടുനീങ്ങുന്നത് കണ്ട് പിടിച്ചുനിർത്താൻ ശ്രമിക്കുന്നതിനിടെ കാലിടറി തലയിടിച്ചുവീണ് ഡ്രൈവർക്ക് ദാരുണാന്ത്യം. കണ്ണൂർ മുണ്ടേരിയിലാണ് സംഭവം. വലിയന്നൂർ റോഡിൽ മുണ്ടേരി ചിറക്ക് സമീപം താമസിക്കുന്ന പണ്ടാരവളപ്പിൽ 62 കാരനായ എ.പി.സുലൈമാൻ ആണ് മരിച്ചത്. ഏച്ചൂർ വട്ടപ്പൊയിൽ സ്വദേശിയാണ്.
വ്യാഴാഴ്ച വൈകിട്ട് മുണ്ടേരി ചിറയ്ക്കു സമീപത്തെ വീടിനു മുന്നിലായിരുന്നു അപകടം. ഓട്ടോ നിർത്തി ഗെയ്റ്റ് തുറക്കുന്നതിനായി പുറത്തിറങ്ങിയതായിരുന്നു. ഈ സമയം ഓട്ടോ പിന്നോട്ട് ഉരുണ്ടു നീങ്ങി. ഓടിയെത്തി പിടിച്ച് നിർത്താൻ ശ്രമിക്കവെ കാലിടറി തലയിടിച്ച് വീഴുകയായിരുന്നു. ചാലയിലെ സ്വകാര്യ ആശുപത്രിയിൽ എത്തിച്ചെങ്കിലും വെള്ളിയാഴ്ച പുലർച്ചയോടെ മരണം സംഭവിച്ചു. ഭാര്യ: ആയിഷ.