കക്ഷിരാഷ്ട്രീയത്തിന്റെയും, തിരഞ്ഞെടുപ്പിന്റെയും പേരില് മത ചിഹ്നങ്ങളെ അവഹേളിക്കുന്നതും മതത്തിന്റെ ആചാരങ്ങളെയും സംസ്കാരങ്ങളെയും അവമതിക്കുന്നതും അപലപനീയമാണെന്ന് സമസ്ത കേരള ജംഇയ്യത്തുല് ഉലമ ജനറല് സെക്രട്ടറി കാന്തപുരം എ പി അബൂബക്കര് മുസ്ലിയാര്. മുസ്ലിം സമുദായത്തിന്റെ പേരില് സംഘടിക്കുന്ന രാഷ്ട്രീയ സംഘടനകളുടെ തിരഞ്ഞെടുപ്പ് വിജയാഘോഷത്തിന്റെ ഭാഗമായി അന്യസ്ത്രീ പുരുഷന്മാര് കൂടിച്ചേര്ന്നും കെട്ടിപ്പിടിച്ചും പരസ്പരം കൈകൊട്ടിയും തെരുവിലിറങ്ങി പ്രകടനം നടത്തുന്നതും അഴിഞ്ഞാടുന്നതും മതം അനുവദിക്കാത്ത രീതിയിലുള്ള ആഭാസങ്ങള് നടത്തുന്നതും അംഗീകരിക്കില്ല.
സ്ത്രീകള്ക്ക് അവരുടേതായ സമ്പൂര്ണ്ണ സ്വാതന്ത്ര്യവും മാന്യതയും ഇസ്ലാം വകവെച്ചു നല്കിയിട്ടുണ്ട്, അതെല്ലാം അവഗണിച്ച് മാനുഷിക മൂല്യങ്ങള്ക്ക് പോലും വിലകല്പ്പിക്കാതെയുള്ള പ്രവര്ത്തനങ്ങള് പ്രതിഷേധാര്ഹമാണ്. ഇത്തരം പ്രവണതകള് മേലില് ഉണ്ടാവാതിരിക്കാന് ബന്ധപ്പെട്ടവര് ജാഗ്രത കാണിക്കണമെന്നും , മത ചിഹ്നങ്ങളേയും ആചാര അനുഷ്ഠാന സംസ്കാരങ്ങളെയും വിലമതിക്കാന് ആവശ്യമായ കാര്യങ്ങള് നേതാക്കളില് നിന്ന് ഉണ്ടാവണമെന്നും സമസ്ത പറഞ്ഞു.ഹൈന്ദവര് ബഹുമാനിക്കുകയും ആദരിക്കുകയും ചെയ്യുന്ന ശബരിമല പോലുള്ളതിനെ അവഹേളിക്കുന്നതും കക്ഷിരാഷ്ട്രീയത്തിനു വേണ്ടി ഉപയോഗപ്പെടുത്തുന്നതും ശരിയല്ലെന്നും സമസ്ത പ്രസ്താവനയില് പറഞ്ഞു .