സംസ്ഥാനത്ത് ഗാര്ഹികേതര ആവശ്യങ്ങള്ക്കുള്ള പാചക വാതക സിലണ്ടറുകളുടെ ക്ഷാമം നേരിടാന് അടിയന്തിര നടപടികള് സ്വീകരിക്കാന് മുഖ്യമന്ത്രിയുടെ നേതൃത്വത്തില് ചേര്ന്ന ഉന്നതതല യോഗം തീരുമാനിച്ചു. ക്ഷാമം തടയാന് മുന്ഗണന ക്രമം നിശ്ചയിക്കാനും കരിഞ്ചന്തയും പൂഴ്ത്തിവെയ്പ്പും തടയാന് എന്ഫോഴ്സ്മെന്റ് സംഘം രൂപീകരിക്കാനും ഉന്നതതലയോഗം തീരുമാനിച്ചു.
വ്യാവസായിക – ഗാര്ഹിക ഉപയോഗങ്ങള്ക്ക് ആവശ്യമായ പാചക വാതക സിലണ്ടറുകളുടെ ദിനം പ്രതിയുള്ള ഉപഭോഗം, വിതരണം എന്നിവ നിരീക്ഷിക്കാന് സംസ്ഥാന അടിസ്ഥാനത്തില് മോണിറ്ററിംഗ് കമ്മറ്റി രൂപീകരിക്കും. ജില്ലകളില് കളക്ടര്മാരുടെ നേതൃത്വത്തില് ജില്ലാതല മോണിറ്ററിംഗ് കമ്മറ്റിയും ഇതിനോട് അനുബന്ധമായി രൂപീകരിക്കും. ഇതിനായി പ്രത്യേകം തയ്യാറാക്കിയ ഡാഷ് ബോര്ഡ് ഉപയോഗിച്ചാവും നിരീക്ഷണം നടത്തുക. മുഖ്യമന്ത്രിയുടെ നേതൃത്വത്തില് വിവിധ പാചക വാതക കമ്പനി പ്രതിനിധികളുമായി സംസ്ഥാന സര്ക്കാര് നടത്തിയ ചര്ച്ചയിലാണ് പാചക വാതക പ്രതിസന്ധി നേരിടാന് അടിയന്തിര നടപടികള് കൈകൊള്ളാന് തീരുമാനിച്ചത്.