തിരഞ്ഞെടുപ്പിനോടനുബന്ധിച്ച് പൊലീസ് നടത്തിയ കർശന പരിശോധനയിൽ പയ്യന്നൂരിൽ മാരക ലഹരിമരുന്നുകളുമായി ദമ്പതികളടക്കം മൂന്ന് പേർ പിടിയിൽ. ചാലാട് സ്വദേശി നാദീർ നൂറുദ്ദീൻ, ഭാര്യ ഐന, നടാൽ സ്വദേശി ഷാനിദ് കെ എന്നിവരെയാണ് പയ്യന്നൂർ പൊലീസ് അറസ്റ്റ് ചെയ്തത്. ഇവരിൽ നിന്ന് വലിയ അളവിൽ എംഡിഎംഎയും ഹാഷിഷ് ഓയിലും കണ്ടെടുത്തു.
പ്രതികളിൽ നിന്ന് 41 ഗ്രാം എംഡിഎംഎയും 241 മില്ലി ഹാഷിഷ് ഓയിലുമാണ് പൊലീസ് പിടിച്ചെടുത്തത്. വിപണിയിൽ ലക്ഷങ്ങൾ വിലമതിക്കുന്ന മാരക ലഹരിമരുന്നുകളാണിവ. തിരഞ്ഞെടുപ്പ് സുരക്ഷയുടെ ഭാഗമായി പൊലീസ് നടത്തിവരുന്ന രാത്രികാല പരിശോധനയ്ക്കിടെയാണ് പ്രതികൾ വലയിലായത്. സംശയാസ്പദമായ സാഹചര്യത്തിൽ കണ്ട പ്രതികളെ തടഞ്ഞുനിർത്തി പരിശോധിക്കുകയായിരുന്നു. ചാലാട് സ്വദേശിയായ നാദീറും ഭാര്യ ഐനയും ലഹരി ഇടപാടുകളിൽ നേരിട്ട് പങ്കാളികളാണെന്നാണ് പ്രാഥമിക നിഗമനം. കൂടെയുണ്ടായിരുന്ന നടാൽ സ്വദേശി ഷാനിദിനെയും പോലീസ് കസ്റ്റഡിയിലെടുത്തു.
ലഹരിമരുന്ന് എവിടെ നിന്നാണ് കൊണ്ടുവന്നതെന്നും ഇതിന് പിന്നിൽ വലിയ റാക്കറ്റുകൾ ഉണ്ടോ എന്നും പൊലീസ് അന്വേഷിച്ചുവരികയാണ്. പ്രതികളെ കോടതിയിൽ ഹാജരാക്കി റിമാൻഡ് ചെയ്യാനുള്ള നടപടികൾ പുരോഗമിക്കുന്നു. തിരഞ്ഞെടുപ്പ് കാലത്തെ ലഹരി കടത്ത് തടയുന്നതിനായി പൊലീസ് നടത്തുന്ന കർശന നിരീക്ഷണമാണ് പ്രതികളെ കുടുക്കാൻ സഹായിച്ചത്. ലഹരി മാഫിയകൾക്കെതിരെ വരും ദിവസങ്ങളിലും പരിശോധന ശക്തമായി തുടരുമെന്ന് പൊലീസ് അറിയിച്ചു.