രജിസ്ട്രേഷൻ വകുപ്പിനെ കാലത്തിനൊപ്പം ആധുനികവൽക്കരിച്ചു…മന്ത്രി കടന്നപ്പള്ളി രാമചന്ദ്രൻ

        

തിരുവനന്തപുരം: സംസ്ഥാനത്തെ ഏറ്റവും പഴക്കമുള്ള വകുപ്പായ രജിസ്ട്രേഷൻ വകുപ്പിനെ കാലത്തിനൊപ്പം ആധുനികവൽക്കരിക്കാൻ കഴിഞ്ഞതിന്‍റെ സന്തോഷം പങ്കുവച്ച് വകുപ്പ് മന്ത്രി കടന്നപ്പള്ളി രാമചന്ദ്രൻ. കിഫ്ബിയിൽ നിന്നും 105.31 കോടി രൂപ രജിസ്ട്രേഷൻ വകുപ്പിനായി നീക്കിവച്ചു. 2016ൽ കിഫ്ബി പദ്ധതികൾ തയ്യാറാക്കിയപ്പോൾ തന്നെ രജിസ്ട്രേഷൻ വകുപ്പും പദ്ധതി തയ്യാറാക്കി. 100 വർഷത്തിലേറെ പഴക്കമുള്ള കെട്ടിടങ്ങൾക്കാണ് മുൻഗണന നൽകിയത്. 48 സബ് രജിസ്ട്രാർ ഓഫീസുകൾക്കും 3 രജിസ്ട്രേഷൻ കോംപ്ലക്സുകൾക്കും കെട്ടിടം പണിയാനും കെട്ടിടങ്ങളുടെ അറ്റകുറ്റപ്പണികൾക്കുമായാണ് പദ്ധതി തയ്യാറാക്കിയത്. 45 സബ് രജിസ്ട്രാർ ഓഫീസുകളുടെയും രണ്ട് രജിസ്ട്രേഷൻ കോംപ്ലക്സുകളുടെയും നിർമാണം പൂർത്തീകരിച്ച് പ്രവർത്തനം തുടങ്ങി. ഒരു കെട്ടിടത്തിന്‍റെ അറ്റകുറ്റപ്പണിയും പൂർത്തിയായി. മൂന്ന് സബ് രജിസ്ട്രാർ ഓഫീസുകളുടെയും ഒരു രജിസ്ട്രേഷൻ കോംപ്ലക്സിന്‍റെയും നിർമാണം വൈകാതെ പൂർത്തിയാകുമെന്നും മന്ത്രി പറഞ്ഞു