കണ്ണൂർ: നിയമസഭാ തിരഞ്ഞെടുപ്പിന്റെ പരസ്യപ്രചാരണം അവസാനിക്കാനിരിക്കെ, സംസ്ഥാന സർക്കാരിനെതിരെ ഭരണവിരുദ്ധ വികാരമില്ലെന്ന് പിണറായി വിജയൻ. കേരളത്തിന്റെ മനസ്സ് എപ്പോഴും എൽഡിഎഫിനൊപ്പമാണെന്നും ജനങ്ങൾ വികസനത്തുടർച്ച ആഗ്രഹിക്കുന്നുണ്ടെന്നും അദ്ദേഹം കണ്ണൂരിൽ നടന്ന വാർത്താസമ്മേളനത്തിൽ വ്യക്തമാക്കി.
സർക്കാരിന്റെ പ്രവർത്തനങ്ങളിൽ ജനങ്ങൾ തൃപ്തരാണ്. വികസന ക്ഷേമ പ്രവർത്തനങ്ങൾ ജനങ്ങളിലേക്ക് എത്തിയിട്ടുണ്ട്. അതുകൊണ്ടുതന്നെ ഭരണവിരുദ്ധ വികാരം എന്നൊന്ന് സംസ്ഥാനത്തില്ല. സിപിഎം-ബിജെപി ഡീൽ ഉണ്ടെന്ന കോൺഗ്രസിന്റെ ആരോപണം അവരുടെ രാഷ്ട്രീയ പാപ്പരത്തമാണ് കാണിക്കുന്നത്. ജനങ്ങളെ തെറ്റിദ്ധരിപ്പിക്കാനുള്ള വിലകുറഞ്ഞ തന്ത്രമാണിതെന്നും മുഖ്യമന്ത്രി വിമർശിച്ചു.
കോൺഗ്രസ് ഉന്നയിക്കുന്ന ആരോപണങ്ങൾക്ക് വസ്തുതയുമായി യാതൊരു ബന്ധവുമില്ല. ബിജെപിയെ നേരിടാൻ എൽഡിഎഫിന് മാത്രമേ സാധിക്കൂ എന്ന് കേരളത്തിലെ ജനങ്ങൾക്കറിയാമെന്നും അദ്ദേഹം കൂട്ടിച്ചേർത്തു. വികസന നേട്ടങ്ങൾ ഉയർത്തിക്കാട്ടി ജനവിധി അനുകൂലമാക്കാൻ എൽഡിഎഫിന് സാധിക്കുമെന്നും അദ്ദേഹം പ്രത്യാശ പ്രകടിപ്പിച്ചു.