കൊച്ചി: താരസംഘടനയായ ‘അമ്മ’യുടെ ഭരണസമിതിയിലേക്ക് താൻ മത്സരിക്കാനില്ലെന്ന് വ്യക്തമാക്കി നടി അൻസിബ ഹസൻ. സംഘടനയിലെ അംഗങ്ങൾക്ക് അയച്ച തുറന്ന കത്തിലാണ് താരം തന്റെ പിന്മാറ്റം പരസ്യമാക്കിയത്. യുവതലമുറ കൂടുതൽ ആർജ്ജവത്തോടെ മത്സരരംഗത്തേക്ക് കടന്നുവരണമെന്നാണ് തന്റെ ആഗ്രഹമെന്നും താരം കത്തിൽ കുറിച്ചു. സംഘടനയുടെ ഭാവി പ്രവർത്തനങ്ങൾ കൂടുതൽ മികച്ച രീതിയിൽ മുന്നോട്ട് പോകട്ടെയെന്ന് ആശംസിച്ച അൻസിബ, പുതിയൊരു നേതൃനിരയ്ക്കായി താൻ കളം ഒഴിയുകയാണെന്നും വ്യക്തമാക്കി.
അൻസിബ അംഗങ്ങൾക്ക് അയച്ച കത്ത്….
പ്രിയപ്പെട്ടവരേ,
എന്റെ ജീവിതയാത്രയിൽ എനിക്കു ലഭിച്ച ഏറ്റവും വലിയ അംഗീകാരം നിങ്ങളുടെ സ്നേഹവും പിന്തുണയുമാണ്. അതിന് വാക്കുകൾ കൊണ്ട് നന്ദി പറയുന്നത് അപൂർണ്ണമായിരിക്കും. ഒപ്പം നിൽക്കുന്ന ഓരോരുത്തരുടെയും ഹൃദയത്തിൽ എനിക്ക് ലഭിച്ച ഈ സ്ഥാനമാണ് എൻ്റെ ഏറ്റവും വലിയ പുരസ്കാരം.‘അമ്മ’ സംഘടനയുമായി ബന്ധപ്പെട്ട്, ഇനി ഒരു ഭാരവാഹിത്വത്തിലേക്ക് മത്സരിക്കാനോ സ്ഥാനങ്ങൾ വഹിക്കാനോ ഞാൻ ആഗ്രഹിക്കുന്നില്ല. സംഘടനയുടെ ഭാവി പ്രവർത്തനങ്ങൾ മികച്ച രീതിയിൽ മുന്നോട്ട് പോകട്ടെ എന്ന് ആശംസിക്കുന്നു. ശക്തവും, കരുണയും, ആർജ്ജവവുമുള്ള ഒരു പുതിയ യുവനിര ഇതിനായി കടന്നുവരട്ടെ. എല്ലാവർക്കും ഹൃദയം നിറഞ്ഞ നന്ദി. സ്നേഹത്തോടെ, അൻസിബ ഹസ്സൻ