തിരുവനന്തപുരം: സിപിഐഎം തിരുവനന്തപുരം ജില്ലാ സെക്രട്ടറി സ്ഥാനത്തെച്ചൊല്ലി പാർട്ടിയിൽ ഭിന്നത രൂക്ഷമാകുന്നു. വി. ജോയിയെ ജില്ലാ സെക്രട്ടറിയാക്കുന്നതിനെ ശക്തമായി എതിർത്ത് മുതിർന്ന നേതാവ് കടകംപള്ളി സുരേന്ദ്രൻ രംഗത്തെത്തി. വി. ജോയിക്ക് പകരം മന്ത്രി വി. ശിവൻകുട്ടിയെ ജില്ലാ സെക്രട്ടറിയാക്കണമെന്നാണ് കടകംപള്ളി സുരേന്ദ്രൻ ആവശ്യപ്പെട്ടത്. ജില്ലയിൽ നിന്നുള്ള സംസ്ഥാന സമിതി അംഗങ്ങളുടെ യോഗത്തിൽ വി. ശിവൻകുട്ടിയുടെ പേര് കടകംപള്ളി ഔദ്യോഗികമായി നിർദ്ദേശിക്കുകയും ചെയ്തു
എന്നാൽ കടകംപള്ളിയുടെ നിർദ്ദേശം തള്ളിയ സംസ്ഥാന നേതൃത്വം, സമ്മേളനം തിരഞ്ഞെടുത്ത വി. ജോയി തന്നെ സെക്രട്ടറി സ്ഥാനത്ത് തുടരട്ടെയെന്ന നിലപാടാണ് സ്വീകരിച്ചത്. മുതിർന്ന നേതാക്കളായ ആനാവൂർ നാഗപ്പൻ, എം. വിജയകുമാർ എന്നിവർ വി. ജോയിയെ അനുകൂലിച്ച് രംഗത്തെത്തിയതോടെയാണ് ജോയിക്ക് വഴിതെളിഞ്ഞത്. ജില്ലയിൽ നിന്നുള്ള സംസ്ഥാന സമിതി അംഗങ്ങളുടെ യോഗത്തിലാണ് ഒടുവിൽ വി. ജോയിയെ ജില്ലാ സെക്രട്ടറിയാക്കാൻ ധാരണയായത്. നാളെ ചേരുന്ന ജില്ലാ കമ്മിറ്റി യോഗത്തിൽ സംസ്ഥാന സെന്റർ വി. ജോയിയുടെ പേര് ഔദ്യോഗികമായി നിർദ്ദേശിക്കും.
സിപിഐഎം തിരുവനന്തപുരം ജില്ലാ സെക്രട്ടറിയെ തീരുമാനിക്കുന്നതുമായി ബന്ധപ്പെട്ട് ജില്ലയിലെ പ്രമുഖ നേതാക്കളുമായി സംസ്ഥാന സെക്രട്ടറി എം.വി. ഗോവിന്ദൻ വിശദമായ ചർച്ച നടത്തിയിരുന്നു. എകെജി സെന്ററിൽ നടന്ന ഈ നിർണ്ണായക ചർച്ചയിൽ പ്രതിപക്ഷ നേതാവ് പിണറായി വിജയനും പങ്കെടുത്തു.
എംഎൽഎമാർ പാർട്ടി ജില്ലാ സെക്രട്ടറി സ്ഥാനം ഒഴിയണമെന്നതാണ് സിപിഐഎമ്മിലെ പൊതുവായ സംഘടനാ രീതി. വി. ജോയി നിലവിൽ വർക്കലയിൽ നിന്നുള്ള എംഎൽഎയാണ്. എന്നാൽ തിരുവനന്തപുരം ജില്ലയിൽ നിലനിൽക്കുന്ന രൂക്ഷമായ വിഭാഗീയതയും തർക്കങ്ങളും കാരണമാണ് എംഎൽഎ ആയിരുന്നിട്ടും ജോയിക്ക് സ്ഥാനം ഒഴിയാൻ സാധിക്കാത്തതെന്നാണ് വിവരം. നേരത്തെ നിയമസഭാ തിരഞ്ഞെടുപ്പിൽ മത്സരിച്ചതിനെ തുടർന്ന് വി. ജോയിയെ ജില്ലാ സെക്രട്ടറി സ്ഥാനത്ത് നിന്ന് താൽക്കാലികമായി മാറ്റിയിരുന്നു. ഈ കാലയളവിൽ സംസ്ഥാന കമ്മിറ്റി അംഗമായ എ.എ. റഹീമിനായിരുന്നു ജില്ലാ സെക്രട്ടറിയുടെ താൽക്കാലിക ചുമതല നൽകിയിരുന്നത്. താൽക്കാലിക ചുമതലകൾക്ക് വിരാമമിട്ടാണ് ഇപ്പോൾ വി. ജോയിയെ തന്നെ പൂർണ്ണ ചുമതലയോടെ നിലനിർത്താൻ സംസ്ഥാന നേതൃത്വം തീരുമാനിച്ചിരിക്കുന്നത്.