സംസ്ഥാനത്ത് നിപ വൈറസ് ഭീഷണി തുടരുന്നതിനിടെ രോഗപ്രതിരോധത്തിനും ചികിത്സയ്ക്കുമായി ആവശ്യമായ രണ്ട് തരം മരുന്നുകൾ ഇന്ന് ഡൽഹിയിൽ നിന്ന് വിമാനമാർഗം കേരളത്തിലെത്തിക്കും. കോഴിക്കോട് മെഡിക്കൽ കോളേജിൽ ജീവൻരക്ഷാ മരുന്നുകളുടെ ലഭ്യത സംബന്ധിച്ച് ഉയർന്ന ആശങ്കകൾക്കിടെയാണ് ആരോഗ്യവകുപ്പ് ഇക്കാര്യം അറിയിച്ചത്.
മെഡിക്കൽ കോളേജിൽ റെംഡിസിവർ ഉൾപ്പെടെയുള്ള അത്യാവശ്യ മരുന്നുകൾക്ക് ക്ഷാമമുണ്ടെന്ന് ആരോപിച്ച് പ്രതിപക്ഷം രംഗത്തെത്തിയിരുന്നു. നിപ ബാധിച്ച് വെന്റിലേറ്ററിൽ ഗുരുതരാവസ്ഥയിൽ കഴിയുന്ന രോഗിക്ക് ആവശ്യമായ ചികിത്സ ഉറപ്പാക്കുന്നതിൽ വീഴ്ചയുണ്ടെന്ന വിമർശനവും ഉയർന്നു. ആശുപത്രിയിൽ ആവശ്യമായ മരുന്നുകളുടെ സ്റ്റോക്ക് ലഭ്യമല്ലെന്ന വിവരം അധികൃതർ തന്നെ പുറത്തുവിട്ട സാഹചര്യത്തിൽ സർക്കാർ അടിയന്തരമായി ഇടപെടണമെന്ന് പ്രതിപക്ഷം ആവശ്യപ്പെട്ടു.അതേസമയം, മരുന്ന് ക്ഷാമം സംബന്ധിച്ച വാർത്തകൾ തള്ളി ആരോഗ്യവകുപ്പ് രംഗത്തെത്തി. കോഴിക്കോട് ജില്ലയിൽ പുതിയ നിപ കേസുകളൊന്നും റിപ്പോർട്ട് ചെയ്തിട്ടില്ലെന്ന് ആരോഗ്യ മന്ത്രി കെ. മുരളീധരൻ വ്യക്തമാക്കി. മുൻകരുതൽ നടപടികളുടെ ഭാഗമായി ക്വാറന്റൈനിൽ കഴിയുന്ന മൂന്ന് പേരെ ആശുപത്രിയിൽ പ്രവേശിപ്പിച്ച് അവരുടെ സാമ്പിളുകൾ പരിശോധനയ്ക്കായി അയച്ചിട്ടുണ്ടെന്നും അദ്ദേഹം പറഞ്ഞു.
നിലവിൽ ചികിത്സയിലുള്ള രോഗിക്ക് മെഡിക്കൽ ബോർഡിന്റെ ശുപാർശ പ്രകാരം ഐ.സി.എം.ആർ മാർഗനിർദേശങ്ങൾ പാലിച്ച് മോണോക്ലോണൽ ആന്റിബോഡിയുടെ ആദ്യ ഡോസ് നൽകിയിട്ടുണ്ടെന്നും ആരോഗ്യ മന്ത്രി അറിയിച്ചു. രോഗവ്യാപനം തടയുന്നതിനും ചികിത്സാ സംവിധാനങ്ങൾ ശക്തിപ്പെടുത്തുന്നതിനും എല്ലാ നടപടികളും സ്വീകരിച്ചുവരുന്നതായും അദ്ദേഹം കൂട്ടിച്ചേർത്തു