ആരോഗ്യവകുപ്പ് ഡയറക്ടർ കെ.ജെ. റീനയെ സ്ഥലം മാറ്റിയ സർക്കാർ നടപടി തടഞ്ഞുകൊണ്ടുള്ള കേരള അഡ്മിനിസ്ട്രേറ്റീവ് ട്രൈബ്യൂണലിന്റെ ഇടക്കാല ഉത്തരവ് ഹൈക്കോടതി റദ്ദാക്കി. ട്രൈബ്യൂണലിൻ്റെ സ്റ്റേ ഉത്തരവ് കൃത്യമായ നടപടി ക്രമങ്ങൾ പാലിക്കാതെയാണെന്ന് ചൂണ്ടിക്കാണിച്ചാണ് ഹൈക്കോടതി ഡിവിഷൻ ബെഞ്ചിന്റെ ഈ സുപ്രധാന വിധി. സർക്കാർ എടുത്ത സ്ഥലംമാറ്റ നടപടിയെ ചോദ്യം ചെയ്ത് കെ.ജെ. റീന സമർപ്പിച്ച ഹർജിയിലായിരുന്നു മുൻപ് അഡ്മിനിസ്ട്രേറ്റീവ് ട്രൈബ്യൂണൽ സ്റ്റേ അനുവദിച്ചിരുന്നത്.
കെ.ജെ. റീനയുടെ സ്ഥലംമാറ്റം മരവിപ്പിച്ച ട്രൈബ്യൂണൽ നടപടിക്കെതിരെ സംസ്ഥാന സർക്കാർ സമർപ്പിച്ച അപ്പീൽ ഹർജി പരിഗണിച്ചാണ് ഹൈക്കോടതി ഉത്തരവ് പുറപ്പെടുവിച്ചത്. സ്ഥലംമാറ്റവുമായി ബന്ധപ്പെട്ട തർക്കത്തിൽ കൃത്യമായ വസ്തുതകളും നിയമപരമായ നടപടിക്രമങ്ങളും പൂർണ്ണമായി പരിശോധിക്കാതെയാണ് ട്രൈബ്യൂണൽ സ്റ്റേ നൽകിയതെന്ന് ഹൈക്കോടതി ഡിവിഷൻ ബെഞ്ച് നിരീക്ഷിച്ചു. ഹൈക്കോടതിയുടെ പുതിയ ഉത്തരവോടെ കെ.ജെ. റീനയെ സ്ഥലം മാറ്റിക്കൊണ്ടുള്ള മുൻ സർക്കാർ ഉത്തരവിന് നിയമസാധുത തിരിച്ചുകിട്ടിയിരിക്കുകയാണ്.ആരോഗ്യവകുപ്പിലെ ഉയർന്ന ഉദ്യോഗസ്ഥരുടെ സ്ഥലംമാറ്റവുമായി ബന്ധപ്പെട്ട് കഴിഞ്ഞ കുറച്ചു ദിവസങ്ങളായി വലിയ രീതിയിലുള്ള തർക്കങ്ങളും ചർച്ചകളും നടക്കുന്നുണ്ടായിരുന്നു. ഇതിനിടയിലാണ് വകുപ്പ് മേധാവിയുടെ സ്ഥലംമാറ്റക്കേസിൽ സർക്കാരിന് അനുകൂലമായ വിധി ഉന്നത കോടതിയിൽ നിന്നും ഉണ്ടാകുന്നത്. ഹൈക്കോടതി വിധി വന്ന പശ്ചാത്തലത്തിൽ ആരോഗ്യവകുപ്പിൽ പുതിയ ഡയറക്ടറെ നിയമിക്കുന്നത് ഉൾപ്പെടെയുള്ള തുടർനടപടികളുമായി സർക്കാരിന് ഇനി മുന്നോട്ട് പോകാം. വരും ദിവസങ്ങളിൽ ഈ വിഷയത്തിൽ കൂടുതൽ ഭരണപരമായ മാറ്റങ്ങൾ ഉണ്ടായേക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.