വിഴിഞ്ഞം അന്താരാഷ്ട്ര തുറമുഖത്തിന്റെ ഓഹരി കൈമാറ്റവുമായി ബന്ധപ്പെട്ട വിവാദത്തിൽ മുഖ്യമന്ത്രി വി.ഡി. സതീശനെതിരെ കടുത്ത വിമർശനങ്ങളുമായി സിപിഐഎം നേതാവ് പി. രാജീവും സംസ്ഥാന സെക്രട്ടറി എം.വി. ഗോവിന്ദനും രംഗത്ത്. കരാർ വ്യവസ്ഥകളിലല്ല, മറിച്ച് ഓഹരി കൈമാറ്റത്തിന് മുൻപ് ആവശ്യമായ മുൻകൂർ അനുമതി വാങ്ങിയോ എന്നതിലാണ് തർക്കമെന്നും ഈ ചോദ്യത്തിൽ നിന്ന് മുഖ്യമന്ത്രി ഒളിച്ചോടുകയാണെന്നും പി. രാജീവ് കുറ്റപ്പെടുത്തി.
വിഴിഞ്ഞം വിഷയത്തിൽ മുഖ്യമന്ത്രി കല്ലുവെച്ച നുണകൾ സത്യമെന്ന രീതിയിലാണ് ജനങ്ങളോട് പറയുന്നതെന്ന് പി. രാജീവ് വാർത്താസമ്മേളനത്തിൽ ആരോപിച്ചു. ഇരിക്കുന്ന പദവിയുടെ ഗൗരവം മുഖ്യമന്ത്രി മനസിലാക്കണമെന്നും അദ്ദേഹത്തിന് ചേരുന്ന ശരീരഭാഷയല്ല ഇതെന്നും രാജീവ് പരിഹസിച്ചു. അതേസമയം, വിഴിഞ്ഞം ഓഹരി കൈമാറ്റ വാർത്ത നൽകിയ കാര്യത്തിൽ സ്വന്തം മുഖപത്രമായ ദേശാഭിമാനിയെ പരസ്യമായി തള്ളി സിപിഐഎം സംസ്ഥാന സെക്രട്ടറി എം.വി. ഗോവിന്ദൻ രംഗത്തെത്തി. ദേശാഭിമാനിക്ക് വാർത്ത നൽകിയതിൽ തെറ്റ് പറ്റിയെന്നും പാർട്ടി പത്രത്തിൽ അത്തരമൊരു വാർത്ത വരാൻ പാടില്ലായിരുന്നുവെന്നും അദ്ദേഹം വ്യക്തമാക്കി. വരും ദിവസങ്ങളിൽ ദേശാഭിമാനിയിൽ പാർട്ടിയുടെ കൂടുതൽ ശ്രദ്ധയും മേൽനോട്ടവും വേണ്ടിവരുമെന്നും അദ്ദേഹം കൂട്ടിച്ചേർത്തു.