വലിയതും സങ്കീർണവുമായ ബഹിരാകാശ ദൗത്യങ്ങളിലേക്ക് കൂടുതൽ ശ്രദ്ധ കേന്ദ്രീകരിക്കാനാണ് ഐഎസ്ആർഒ ഒരുങ്ങുന്നത്. ബഹിരാകാശ മേഖലയിൽ സ്വകാര്യ സ്ഥാപനങ്ങളുടെ പങ്കാളിത്തം വർധിപ്പിക്കുന്നതിനുള്ള സംവിധാനങ്ങൾക്കൊപ്പം ഐഎസ്ആർഒയുടെ പ്രധാന ഉത്തരവാദിത്തങ്ങൾ തുടരുമെന്നും വിശദീകരണത്തിൽ വ്യക്തമാക്കുന്നു.
സർക്കാർ ഇതര സ്ഥാപനങ്ങളുടെ പങ്കാളിത്തം ഏകോപിപ്പിക്കുന്നതിനായി ഇൻ-സ്പേസ് പ്രവർത്തിക്കും. ഐഎസ്ആർഒ വികസിപ്പിക്കുന്ന സാങ്കേതികവിദ്യകളുടെ വാണിജ്യവത്കരണ ചുമതല ന്യൂ സ്പേസ് ഇന്ത്യ ലിമിറ്റഡിനായിരിക്കും. പുതിയ ബഹിരാകാശ നയം രാജ്യത്തെ ബഹിരാകാശ വിപണി കൂടുതൽ വികസിപ്പിക്കാൻ സഹായിച്ചിട്ടുണ്ടെന്നും ഐഎസ്ആർഒയുടെ ഔദ്യോഗിക കുറിപ്പിൽ പറയുന്നു.